Уллу Хорламны 80-джыллыгъына Эресейни 80 джеринде 80 Ёмюрлюк от бирден джаннганды.

Эресей Федерацияны Президенти Владимир Путин Ёмюрлюк отлары болгъан мемориалла газ бла баджарылсала излегенин айтханында, «Газпром» ПАО «Бирикген Эресей» политика партияны болушлугъу бла саулай Эресейде «Храним огонь Победы» деген патриот ишни бардырыб башлагъанды.
Аны тамалында быйыл байрым (февраль) айны 21-ден бери талай Ёмюрлюк от табигъат газ бла баджарылгъанды.
Уллу Хорламны 80-джыллыгъына уа Эресейни 8 федерал округунда, шахар, эл демей, 80 джеринде 80 Ёмюрлюк от бирден джаннганды.
Алай этер ючюн, «Храним огонь Победы» деген патриот ишни тамалында Кремль къаланы къатында Александр атлы кёгет бачхада Белгисиз солдатны къабырыны аллында джаннган Ёмюрлюк отдан джилтинчиклени лампала бла къралыбызны джер-джеринде табигъат газ бла баджарылгъан Ёмюрлюк отланы джандырыргъа чачхандыла.
Аладан бири Хабез районну Бабуково посёлогунда «Родина-мать» деген мемориалда Ёмюрлюк отну джандыргъанды.
1967-чи джыл ачылгъан «Родина-Мать» деген мемориал бизни регионда эм уллу эсгертмелени бирине саналады. Ол совет солдатны Ата джуртха сюймеклигин кёргюзеди.
Белгисиз солдатны къабырыны аллында джаннган Ёмюрлюк отдан джилтинчик Къарданикден Уллу Ата джурт къазауатха къошулгъан 435 ашхы уланнга аталгъан мемориалны Ёмюрлюк отун джандырыргъа да джетгенди. Ол мемориал да Уллу Хорламны 80-джыллыгъына аталгъан байрамгъа дери табигъат газ бла баджарылгъанды.
Орджоникидзевский посёлокда Кавказ ауушланы фашистледен джакълагъан джигитлеге аталгъан мемориалда Ёмюрлюк от да Белгисиз солдатны къабырыны аллында джаннган Ёмюрлюк отдан келтирилген джилтинден джаннганды.
Бу тарих магъаналы ишле бардырылгъан джерлеге джыйылгъан кърал къуллукъчула, джамагъат келечиле бары да табигъат газ бла тыйгъычсыз баджарылгъан Ёмюрлюк отла къарт аталарыбызны джигитликлерин эсгертгенлей турлукъларын чертгендиле.

(БИЗНИ КОРР.).