Саулай Эресейде бардырылгъан «Знамя Победы» деген патриот акциягъа Къарачай-Черкесияны 6,5 минг сабийи къошулду.
Сабийле, Уллу Хорламны кюнюню аллы бла республиканы джер-джеринден Черкесск шахаргъа джыйылыб, Правительствону Юйюню аллында патриот ишле бардырдыла. Ата джуртубузну миллетчиледен къоруулагъан джигитлеге сый бериуге аталгъан ишге къошулгъанланы арасында сабий садлагъа джюрюген балачыкъла да, орта школну бошай тургъан сохтала да бар эдиле.
Ала, Ата джурт къазауатны кёзюуюндеча, саф-саф тизилиб, марш бардыла, аскер джырла джырладыла, Уллу Хорламны вальс тепсеуюн тепседиле. Сабийле джырлары, тепсеулери бла 1945-чи джыл джаз кёзюуде къралыбызны джер-джеринде, хар юйдегиде да Уллу Хорлам къалай бек сакъланнганын суратларгъа кюрешдиле.
Джетиб келген тёлюбюз, ветеранлагъа разылыкъларын билдире, 80 джылны мындан алда Рейхстагны башына салыннган Къызыл Байракъгъа ушаш уллу байракъны кенг джайдыла. Ол Байракъ совет халкъ Германияны хорлагъаныны белгиси болгъанын республиканы бютеу сохталары да биледиле. Бу окъуу джылны узуну Къарачай-Черкесияны окъуу учреждениелери кёзюу-кёзюую бла Хорламны Белгисин бир-бирлерине бериб тургъандыла.
Къарачай-Черкесияны Башчысы Темрезланы Рашид сабийлеге, Ата джуртха сюймекликлери, тарихибизни билирге тырмашханлары, Хорламны келтирген тёлюге сый бергенлери ючюн, разылыгъын билдиргенди.
Башчы социал сетледе кесини аккаунтларында: «Биз – Уллу Хорламны келтирген тёлюню туудукълары – къарт аталарыбызны джигитликлерин эсгере, ветеранлагъа сый бере, алача, Ата джуртха сюймекликни, кертиликни юлгюсю болуб, бюгюнлюкде аскер къаугъада къралыбызны политикасын джакълагъанлагъа разылыгъыбызны билдиргенлей турургъа керекбиз.
Багъалы джердешлерим! Бютеу къралыбыз ашыгъыб тюбеген байрам бла, Уллу Хорламны 80-джыллыгъы бла байламлы, барынгы да къанлы урушлада къралыбызны джакълагъан ветеранлагъа, алагъа билек болуб, тылда, кече-кюн демей, уруннганлагъа, бусагъатда да аскер къаугъада, тамблагъы кюнюбюз джарыкъ болур ючюн, уллу джигитликле этгенлеге айырыб эс бёлюрге чакъырама.
Келигиз, джигитлерибизни сыйларын мийикде тутарча болайыкъ! Уллу Хорламны кюню бла алгъышлайма!» – деб джазгъанды.
СОЛТАНЛАНЫ З.
