РФ-ны Президенти Владимир Путин хычаман (май) айны 10-да, ингир кеч эте, СМИ-ни келечилери бла тюбешген эди.
Кърал Башчы сёзюню аллында, Уллу Хорламны кюню бла алгъышлаб, бу кюнледе байрамгъа къошулгъанлагъа, 80 джылны мындан алда дунияны башын фашизм зарауатлыкъдан азатларгъа болушханлагъа джюрек разылыгъын билдирди, хычаман (май) айны 7-ден 10-на дери бардырылгъан къууанч ишлени эсеблерин чыгъара, магъаналы билдириу да этди. Владимир Путинни айтханын къысха халда газет окъуучуларыбызгъа теджейбиз.
– Хычаман (май) айны 7-ден 10-на дери Къытай Халкъ Республиканы, Венесуэла Боливариан Республиканы эмда Вьетнам Социалист Республиканы башчылары къошулгъан ишле ётгендиле. Аны тышында СНГ-ны, Азияны, Африканы, Джууукъ Шаркъны, Европа бла Латин Американы къралларыны башчылары бла 20 тюбешиу бардырылгъанды. Саулай да байрам ишлеге 27 кърал башчы, халкъла арасы 10 организацияны тамадалары къошулгъандыла.
13 кърал парадха кеслерини миллет сауутлу кючлерини бёлеклерин ашыргъандыла, ол къралланы башчыларына да разылыгъымы билдиреме. Корея Миллет Демократия Республиканы спецназыны бёлеклерини аскерчилери бла аскер башчыларына, бизникиле бла тенгликде Курск областны киевчи миллетчиледен азатларгъа болушханлары ючюн, энчи тюбеб разылыгъымы билдиргенме.
Бу байрам кюнледе бизни кесибизге да бир къауум уллу политикле ультиматумла салыб, тыйыншлы болмагъан затланы айтыб, «къабха» джыяргъа кюрешгенлерин барыгъыз да кёргенсиз.
Сёзсюз да, Москвада аллай бир тюбешиуню кёзюуюнде Украинада аскер къаугъаны юсюнден да сёлешинмей къалмагъанды. Бюгюн ол затны юсюнден айырыб айтыргъа излейме. Эресей талай кере да къаугъаны тохтатыргъа десе да, Украина хар джол сайын эшитмегенча этиб къояды. Чертиб айтыргъа излегеним, алтотур (март) айны 18-ден арттотур (апрель) айны 17-не дери АБШ-ны Президенти Дональд Трамп бла келишиулюкде, энергетика объектлеге 30 кюнню ичинде окъ-тоб атмазгъа деген мораторийни киевчи миллетчиле иш этиб 130 кере бузгъандыла.
Пасханы кюнлеринде эки джанындан окъ-тоб атылмасын дегеникде, украиначы аскер бёлекле аны да 5 минг чакълы бир кере бузгъандыла. Анга да къарамай, барыбызгъа да сыйлы байрамны – Уллу Хорламны – кюнюне ючюнчю кере эки арада болджаллы джарашыулукъну баямладыкъ.
Кюнбатышда иш нёгерлерибизге да билдирген эдик аны. Биз, Хорламны кюнюнде болджаллы келишиулюкню джорукълары бузулмасала, андан ары арада къаугъаны тохтатыр мадарла излерге деген эдик. Алай а, не келсин, киевчи миллетчиле бизни сёзюбюзню истемедиле. Ол къой, биз ол билдириуню хычаман (май) айны 5-де этген эдик да, аны экинчи кюнюнде бизни джерлерибизге уллу чабыуул этилгенди. Ол чабыуулда тыш къралда чыгъарылгъан 524 БПЛА бла талай ракета атылгъанды, Къара тенгизге адамсыз джюзген 45 моторлу къайыкъ да ийилгенди.
Аны бла да къалмай, РФ-ны Курск бла Белгород областларыны чеклерине 5 кере, башха джерлеге да 36 чабыуул этилгенди.
Киевчи властла бизни арабызда къаугъа тохтасын деген оюмубузну сансыз этген бла къалмай, Хорламны кюнюне Москвагъа келген кърал башчыланы къоркъутургъа да излегендиле. Джангыз бир сорлугъум: ол кърал башчыланы къайсысын къоркъутургъа джетерикди ол миллетчилени къарыулары? Къоркъутургъа излегенле кимледиле? Экинчи дуния къазауатны джылларында СС-ны солдатларына харс ургъанла? Гитлерге къуллукъ этиб, мелиуанла бла адамланы къыргъанланы миллет джигитлеге санаб тургъанла?
Къайтарыб айтама, биз келишиулюкден бир кере да кери турмагъанбыз. 2022-чи джыл переговорланы Украинаны джаны тохтатхан эди. Алай болса да, ол къадар аманлыкъ ишге да къарамай, киевчи властха энтда бир кере, 2022-чи джыл тохтатылгъан келишиулюкню юсюнден сёлешейик деб, теджейбиз. Чертиб айтама: бир тюрлю бир излемсиз.
Арада сёлешиуню аллыбызда орта кюн, хычаман айны 15-де (газет чыгъарыкъ кюн – ред.), Стамбулда башларгъа теджейме. Аллы да анда башланнган эди. Ол заманда арада келишиу къагъытны проектине Киевни джанындан келечиле къол да салгъан эдиле, алай а Кюнбатышны излеми бла ол къагъыт атылыб къалгъанды.
Украина бла къаты сёлеширгеди бизни муратыбыз. Арада чыкъгъан къаугъаны тохтатыр ючюн аны аллындан чурумларын къоратыргъа керекди, келишиулюк да тамамлы болургъа керекди. Биз кёзюулю джарашыулукъну юсюнден айтмайбыз, ВСУ-гъа кюч-къарыу алыб, джангы окъ-тоб хазырлаб, бизге чабыуул этерге заман бермейбиз. Аллай джарашыулукъ кимге керекди?
Бизни излемлерибиз белгилидиле. Мындан ары украиначы властла бла алагъа уу бериб кюрешгенлени этериклерине къарайыкъ. Ала, эшта, миллетлерини излемлерини сагъышын этер орнуна, кеслерини политика джаны бла уллу кёллюлюклерин кёргюзюрге излей болурламы?
Къайтарыб айтама, Эресей эки арада джарашыулукъну, мамырлыкъны бегитирге хазырды. Керти мамырлыкъны излегенле бизни айтханыбызны эшитирле деб, ышанама.
Сёзюню ахырында Владимир Путин журналистлеге да, къралыбызда болумну ётюрюксюз, кертисича кёргюзюб тургъанлары ючюн, разылыгъын билдирди.
ХУБИЙЛАНЫ Фатима.
