Къарачай-Черкесияны сыйлы адамлары! Хар биринги да Уллу Хорламны 80-джыллыгъы бла алгъышлайма!

Къолларына сауут-саба алырча эркишиле Уллу Ата джурт къазауатда джигитлик кёргюзген заманда тылда къартла, тиширыула, сабийле да, джигер урунуб, алагъа билек болгъанларын билебиз. Аланы бирикмекликлери, ётгюрлюклери, тёзюмлюлюклери бла ол къанлы къазауатда къралыбыз хорламлы болгъанды. Биз да алчыланы, батырланы тёлюлери болгъаныбыз бла ёхтемлене джашайбыз!
Бюгюнлюкде да аскер къаугъагъа къошулгъан патриотларыбыз, къарт аталарыча, Ата джуртха кертиликлерин таныта, уллу джигитликле этедиле. Аланы баш муратлары бютеу адам улугъа къатылгъан миллетчиликни къурутууду. Джигитлерибиз, ол муратларына джетер ючюн, Джуртубузну рахатлыгъын сакълар ючюн, совет халкъны джигитлигин унутдурмай, тюзлюкге джол ачар ючюн, джанларын-къанларын аямай кюрешедиле.
Къралыбызны баш байлыгъы Ата джуртун бек сюйген, ашхылыкълагъа учуннган, бирикген халкъыды. Бирикмекликни кючю бла Эресей, не тюрлю сынаудан да сый бла ёте, хорламлы бола келеди, мындан ары да алай барлыкъды!
Бу джарыкъ байрам бла алгъышлай, барынга да сюек саулукъ, таркъаймазлыкъ къарыу, юйдеги насыб теджейме. Джашауугъуз рахат болсун!

РФ-ны Федерал Джыйылыууну Федерация Советини члени САЛПАГЪАРЛАНЫ Ахмат.