Хыйлачыла, терезеле салыучу компанияны келечилерибиз деб, Черкесскеде джашагъан бир тиширыуну аты бла кредит джарашдыргъандыла.

Арттотур (апрель) айны 8-де Черкесскеде джашагъан 21 джыл болгъан тиширыу полициягъа тарыгъыу къагъыт джазгъанды. Тиширыуну хапарына кёре, 2024-чю джыл, джай кёзюуде, ол танымагъан адамла, аны юйюне келиб, Краснодардан терезеле салыучу усталабыз деб, терезелерин кредитге ауушдурургъа теджегендиле. Ол, да ётюрюкчюлеге ийнаныб, разылыгъын билдиргенди.
Тергегенлеринде, джангы терезелеге 118 100 сом чыкъгъанды. Тиширыу кредит джарашдырыргъа документлерин чыгъаргъанды. «Устала» аны документлери бла 120 800 сомгъа кредит алгъандыла. Тиширыугъа да 100 кюнню ичинде аны юйюнде терезелени ауушдурургъа деб этилген кесамат къагъытны бериб кетгендиле.
Кесаматда белгиленнген болджал ётюб, терезелени ауушдурургъа киши келмегенинде, тиширыу «устала» айтхан фирманы адресине дау къагъыт (претензия) ийгенди. 2024-чю джыл эндреуюк (декабрь) айда ол фирмадан анга джууаб келгенди. Письмода, завод аллай терезеле чыгъаргъанын тохтатханы ючюн, кесаматны заманында толтуралмагъанлары, кёб сакълатханлары ючюн, белгиленнгенледен эсе иги терезеле саллыкълары джазылгъанды. Алай а, джангы терезеле бюгюн-бюгече да салынмагъандыла.
Къарачай-Черкесияны хурметли джамагъаты! Арт кёзюуде былай джарсыгъанла бир да кёб болгъандыла. Хыйлачыла хаман джангы лагъымла къураб, адамланы ийнанырча алдаб къоядыла. Ачха тёлеб, джукъ этдирирни аллы бла джумушну баджарлыкъ компанияны юсюнден толу хапар билирге дурус болгъанын эсге алыгъыз!
Аны юсюнден башхала не джазгъанларына интернетде къарагъыз. Сизге кереклича джумушланы этерге эркинлик къагъыты болгъаны бла къалгъанын соругъуз. Кесигизни паспортугъузда джазылгъан энчи хапарыгъызны танымагъан адамларыгъызгъа чыртда билдирмегиз. Къол салырны аллы бла документлени иги окъугъуз.
Эсгермей, кесигизни хыйлачылагъа алдатханыгъыз болса уа, джарсыгъаныгъызны хапарын дженгил огъуна полициягъа билдиригиз.

Кумукова Рамиля,
КъЧР-ни МВД-ны пресс-къуллукъчусу.