Къарачай-Черкес республикан филармонияны мекямына шахарла бла районладан кёб адам джыйылгъанды.
Бюгюн былайда бир ызгъа эки магъаналы иш бардырылады: Тебуланы Шабатны джашы Шукурну 80-джыллыкъ юбилейине аталгъан къууанч бла аны сурат кёрмючю.
Джыйылыуну «Къарачай – алан халкъ» джамагъат бирлешлик бла Тебулары тукъумну кенгеши бирден къурагъандыла. Белгили актёргъа, режиссёргъа, тележурналистге, джазыучугъа сый берирге келгенлени ичинде КъЧР-ни Башчысы бла Правительствосуну Администрациясы келечилери, депутатла, джамагъат къуллукъчула, маданият бла адабиятны келечилери, Шукурну джууукълары, тенглери бардыла. Эм алгъа сёз «Къарачай – алан халкъ» джамагъат бирлешликни тамадасы Хубийланы Хасаннга берилди.
– Шукур халкъыбызны белгили, сыйлы адамларыны бири эди, – деди Хубий улу. – Аны джашау джолу ёсюб келген джаш адамлагъа юлгюдю. Не джаны бла да фахмулу адам болгъаны себебли, ол театр санатда, телевидениеде, чыгъармачылыкъда кесини энчи хатын къойгъанды.
Шукур 1944-чю джыл хычаман (май) айны 9-да Къазах ССР-ни Джамбул областыны Айнагёль станциясында туугъанды.
1957-чи джыл бютеу къарачай халкъ бла бирге Тебуланы юйдегилери да, тарих джуртларына къайтыб, Сары-Тюз элде орналады. Былайда ол орта школну тауусады.
1967-чи джылны къачында Тбилисиде Шота Руставели атлы кърал театрал институтха къарачай джашла бла къызланы алыргъа белгили гюрджю режиссёрла келедиле. Бу иш зор бла кёчюрюлген миллетни джуртуна къайтхандан сора маданиятын кёлтюрюрге аталгъан атламланы бири эди.
Комиссия, сайлаб, 13 адамны институтха алады: Акъбайланы Азретни, Биджиланы Хасанны, Герюгланы Зайнебни, Каппушланы Ульянаны, Къоркъмазланы Кемалны, Къоркъмазланы Валентинаны, Лайпанланы Любаны, Лайпанланы Алимни, Мекерланы Билялны, Ортабайланы Тохтарны, Орусланы Розаны, Хачирланы Казбекни эмда Тебуланы Шукурну.
Ол эм фахмулу, эм иги окъугъан студентлени тизимине киреди – Шота Руставели бла Коте Марджаншивилини стипендияларын алыб турады. 1968-чи джыл Тбилисиде 20 баш окъуу заведениени арасында бардырылгъан конкурсда биринчи оруннга ие болады. Аны эки студент иши Тбилисиде санат музейни фондуна бериледи, аланы бири – «Анализ пьес Вильяма Шекспира».
1968-чи джыл аны Грузин ССР-ни ВЛКСМ-ни АК-ни къурамына аладыла. Ол республиканы комсомолуну XVI-чы съездини ишине делегат болуб къошулады.
1971-чи джыл Шукур бла Акъбайланы Азрет Михаил Себастьянны «Безымянная звезда» деген юч актлы комедиясын къарачай тилге кёчюредиле. Ол актёр къауумну диплом ишлери болады. Бу пьесагъа къарагъанла джаш актёрланы ишлерине уллу багъа бередиле.
Шукур Къарачай драма театрда 30-дан аслам ролну ойнагъанды. Байрамукъланы Халиматны, Аппаланы Билялны, Батчаланы Муссаны, Кёбекланы Билялны эмда башха авторланы пьесаларына кёре салыннган спектаклледе ойнаб, фахмулу болгъанын танытхан бла бирге кесин къараучулагъа сюйдюргенди.
1989-чу джыл Шукур область филармонияда ишлеб тебрейди. Былайда ишлей тургъаны бла статьяла, назмула, поэмала, хапарла да джазыб башлайды. 1993-чю джыл ишлерге телевидениеге кёчеди. 15 джылны ичине ол журналист эмда комментатор болуб 700-ден аслам кере эфирге чыкъгъанды. 5000-ден аслам бериуге баш режиссёрлукъ этгенди.
Ол, Къыргъызиягъа, Къазахстаннга, Тюркге, Сириягъа, Белоруссиягъа, Украинагъа барыб, кёб сейир телебериу этгенди.
1995-чи джыл Къарачайны тогъуз уланына «Эресейни Джигити» деген ат бериледи. Ары дери да миллетибизни эки адамы ол атны джюрютгенди. Телевидениеде ишин къоюб, Тебу улу ол джигитлени юсюнден кино салыб тебрейди. Джашаууну ахыр кюнюне дери ол къарачай халкъны онглу адамларыны юсюнден фильм салгъанны тохтатмайды.
Шукур «Ас-Сафи» деген назму бла джазылгъан философия-дидактика чыгъармасын орус тилде джазгъанды. Ол сегиз бёлюмден къуралгъанды. Джыйылыуда кърал эмда политика къуллукъчу, алим Эриккенланы Ахмат бу чыгъармагъа бек уллу сый эмда магъана бериб сёлешди.
Шукурну билимли, фахмулу, акъыллы, ариу, уллу ишленмеклиги болгъанын чертиб Къарачай-Черкес Республиканы маданият министри Зураб Агирбов, Эресейни махтаулу устазы Доюнланы Абдурахман, «День республики» газетни баш редактору Евгений Кратов, «Къарачай» газетни баш редактору Къоркъмазланы Салима, ГТРК-ны къарачай бёлюмюню тамадасы Джанкёзланы Медина, республикан филармонияны тамадасы Рамазан Бороков, КъЧР-ни Миллет ишлерини, кёбчюлюк коммуникацияла бла басманы хакъындан министерствосуну къуллукъчусу, тарихчи Хатууланы Рашид, Эресейни халкъ артисти Акъбайланы Азрет, Орус драма театрны тамадасы Биджиланы Хасан, Къарачай драма театрны тамадасы Гочияланы Руслан, Джазыучуланы Къарачай-Черкес бёлюмюню тамадасы Байрамкъулланы Науруз эмда башхала сёлешдиле.
Джыйылгъанлагъа Шукурну джашаууну, ишини юсюнден хапар айтхан видеороликле кёргюздюле, белгили джырчыла джырладыла.
Джыйылыуну аягъында Тебулары тукъумну тамадасы Ахмат, сахнагъа чыгъыб, келген миллетге уллу разылыгъын билдирди.
КъЧР-ни маданиятыны махтаулу къуллукъчусу, Эресейни Журналистлерини союзуну члени Тебуланы Шукур дуниядан кетгенликге, аны этген иги-ашхы ишлери, ол фахмусуну кючю бла сюеген «къалала» аны атын унутдурлукъ тюлдюле.
Мамчуланы Дина.
