Сергей Никулин атлы республикан сабий библиотекада Сабий китабны ыйыгъыны бир кюнюнде ары келген сохталагъа Эресейни Джигитлерини юсюнден хапар айтхандыла.
Совет Союзну Джигитлери – Зоя Космодемьянская, Александр Матросов, Николай Гастелло, Рихард Зорге дагъыда мингле бла аскерчиле эмда абычарла, Ата джуртларын джаудан къоруулай, адам ийнанмазча джигитликни юлгюсюн кёргюзгендиле. Аланы атлары эсгертмелеге джазылгъандыла эмда махтаулу аскер тарихибизде сакъланныкъдыла.
Бюгюнлюкде бизни джердешлерибиз, аскер къаугъагъа къошулуб, ётгюрлюкню, Ата джуртха кертиликни юлгюсюн кёргюзедиле.
Ол кюн библиотекада кёб тюрлю мероприятие бардырылгъанды. Ала барысы да ёсюб келген тёлюде патриот сезимлени чыныкъдырыргъа багъышланнгандыла.
Айхай да, сабийле джигитлени юсюнден айтылгъан хапарлагъа эс бёлюб тынгылагъандыла, ала бла ёхтемленирге тыйыншлысын да ангылагъандыла.
Библиотеканы санатла бла адабият бёлюмю «Ата джуртну джакълай» деген тарих-адабият композицияны хазырлагъанды. Электрон презентацияны юсю бла окъуучула Уллу Ата джурт къазауатны тарихи бла шагъырей болгъандыла. Алагъа къазауат бла байламлы киноладан, белгили уруш джырладан юзюкле теджелгендиле. Ол фильмледе, джырлада, урушну ал кюнюнден башлаб, Уллу Хорламны байрагъы чанчылгъанына дери айтылады.
Библиотеканы къуллукъчулары къралыбызны фахмулу суратчыларыны урушха аталгъан суратларын да кёргюзгендиле. Ол суратла къазауат бара тургъанлай салыннгандыла. Бир суратдан сагъышлы командир, биринден джаш аскерчи, биринден назик медсестра къарайдыла. Ала ол кёзюуде бек керек болгъандыла – аскерчилени, башхаланы да учундургъандыла, джау бла хатерсиз сермешге алландыргъандыла.
Окъуучула «Санат да урушха къошулгъанды» деген кёрмюч бла да танышхандыла. Тюрлю-тюрлю суратла, плакатла, документле джаяу аскерчилени джашауларындан хапар айтадыла. Былайда Эресейни Джигити Боташланы Къанаматны суратын, аны юсюнден джазылгъан газет статьяланы да кёрюрге боллукъду. Аскер къаугъада уллу ётгюрлюк, адамлыкъ да танытыб джан берген лётчикге-снайперге, генерал-майоргъа ол сыйлы ат Эресейни Президенти Владимир Путинни Указы бла берилгенди.
Аны бла бирге, «Къарачай-Черкесияны келечилери – аскер къаугъада» деген кёрмючню да теджегендиле къонакълагъа. Бюгюнлюкде аскер къаугъада джигитлик танытхан эмда уллу кърал саугъалагъа ие болгъан 11 адамны юсюнден кёб джангы затны билгендиле сабийле. Библиотеканы къуллукъчусу Брест къаланы, Москваны, Сталинградны, Курскени къоруулай джигитлик этгенлени юсюнден да сохталагъа хапар айтханды.
Андан сора да библиотека къуллукъчула ёсюб келген джаш адамлагъа онглу аскер башчыла В. Чуйков, Г. Жуков, К. Рокоссовский, Хорламны Байрагъын Берлинде орнатыр ючюн, джигитлик, акъылманлыкъ да танытханларын чертгендиле. Сабийле хар айтылгъан сёзге уллу эс бёлюб тынгылагъандыла.
Бютюн да Боташланы Къанаматны хапарына эс бёлгендиле сабийле. Ол, Донецк областда къуршоугъа тюшген отрядны къутхара, джигитлик этиб ёлгенди. Быллай юлгюле сабийлени патриотлукъгъа, Ата джуртха къайгъыра билирге юретгенлерине сёз да джокъду.
Ол кюн дагъыда 5-чи – 9-чу классланы сохталарына джораланыб, «Биз къазауатны юсюнден окъуйбуз» деген тарих дерс да ётгенди.
Сабийле къазауатны къаллай бир къыйынлыкъ келтиргенин джюреклери, акъыллары бла да сезерча кёб юлгю келтириб сёлешгендиле бу джумушха джууаблы болгъан адамла.
Бизни джердешлерибиз, Украинада, Белоруссияда партизан отрядла къураб, фашистлени тынгыларын бузуб тургъандыла. Севастополь джаугъа бой бермей 250 кюн тургъанды, Ленинград 900 кюнню къуршоудан чыгъалмай инджилгенди.
Ол кюн сабийле, уллула да, бир такъыйкъаны шошлукъгъа бёлениб, ёлгенлеге сый бергендиле.
Патриотизмге аталгъан кюн республикан сабий библиотекагъа 150 окъуучу келгенди. Ала барысы да кеслерини билимлерин ёсдюрюрге мадар табхандыла, къралыбызны аскер тарихинден хапарлы болгъандыла.
Къаракетланы Лолита,
библиотеканы къуллукъчусу.
