Уллу Хорламны 80-джыллыгъына аталгъан халкъла арасы аскер-патриот ишге Эресейни ФСБ-ны Къарачай-Черкесияда Чекчи управлениеси да къошулгъанды.
Уллу Хорламны 80-джыллыгъына аталгъан халкъла арасы эстафета байрым (февраль) айны 2-де башланнганды. Анга къошулгъанла Брест къала бла Мурманск шахардан джолгъа чыкъгъандыла. Ала, Уллу Ата джурт къазауатны ордени болгъан белгини бир-бирлерине бере, СНГ-ны къурамында къралланы чеклерини къатлары бла бютеу Эресейни ётюб, Чекчини кюнюне Москвагъа джыйыллыкъдыла.
Бу кюнледе ол патриот ишге Эресейни ФСБ-ны Къарачай-Черкесияда Чекчи управлениесини келечилери да къошулгъандыла. Ала, эстафетачылагъа Кавказ ауушланы къоруулагъанлагъа аталгъан музейни къатында тюбеб, къонакъланы 7 кюнню ичинде бизни регионда тарих магъаналы джерлеге айландырыб, Ата джурт къазауатны кёзюуюнде бизни джерлерибизге келген фашистлеге эм биринчи тюбеген джигит чекчилени эсгериуге аталгъан митингле бардыргъандыла. Ол митинглеге РФ-ны ФСБ-ны КъЧР-де Чекчи управлениесини келечилери бла бирге кърал къуллукъчула, ветеранла, волонтёрла, сохтала дагъыда башхала къошулгъандыла.
«Уллу Хорламны 80-джыллыгъы джууукълашыб келгени бла байламлы къралыбызны тарихин, Ата джурт къазауатны кёзюуюнде совет халкъны джигитлигине, ётгюрлюгюне, тёзюмлюлюгюне, джигерлигине шагъатлыкъ этген затланы эсгеребиз. Ол заманда, джанларын-къанларын аямай, фашистлени тыяргъа кюрешген чекчилени сыйларын барыбыз да кёребиз, аланы разылыкъ бла эсибизге тюшюребиз. Не заманда да Ата джуртну къорууларгъа эм алгъа чекчиле турадыла.
Келигиз, Брест къаланы джаугъа бермез ючюн, чекчиле сау айдан артыкъны къан къазауат этгенлерин эсге бир тюшюрейик. Аланы ёмюрде да унутулмазлыкъ джигитликлери къралыбызны тарихине джазылгъанды», – дегенди РФ-ны ФСБ-ны КъЧР-де Чекчи управлениесини келечиси Виталий Снопов.
Башхала да бизге чууакъ кёкню тюбюнде рахат джашауну саугъа этген джигитлеге разылыкъларын билдиргендиле.
Арттотур (апрель) айны 13-де бу халкъла арасы патриот ишге къошулгъанла эстафетаны белгисин Эресейни ФСБ-ны Къабарты-Малкъарда Чекчи управлениесини келечилерине бергендиле.
СОЛТАНЛАНЫ
Зульфия.
