Уллу Хорламны 80-джыллыгъына кесини тыйыншлы юлюшюн къошар мурат бла «Къарачай» газетни коллективи Совет Союзну эмда Эресейни Джигитлери бла байламлы флешмоб къурагъанды.
Ол бютюн да бек газетни электрон халына келишеди, нек десенг, бюгюнлюкде джаш адамланы асламысы информацияны не тюрлюсюн да интернетден алыргъа сюеди. Не сейирсиниу, интернет, электрон газет, бизни джашауубузгъа кириб, кеслерине энчи орун айыргъандыла.
Къарачай халкъны бюгюнлюкде 12 адамы къралны эм сыйлы атына – Джигит атха – ие болгъанды. Уллу Ата джурт къазауатны джылларында къарачай халкъны джашлары бла къызлары джанларын-къанларын аямай кюрешгендиле. Фашистле бла сермеширге кетген 15 минг адамдан 9 минг адам къралыбызны азатлыгъы ючюн джан бергенди.
Эллиге джууукъ къарачай улан «Совет Союзну Джигити» деген атха теджелгенди. Ай медет, халкъыбызны керексизге Орта Азия бла Къазахстаннга кёчюрюб, аман атха чыгъаргъанлары амалтын, Къарачайны ётгюр уланлары «Джигит» атдан къуру къалгъандыла. Къазауатны кёзюуюнде «Совет Союзну Джигити» деген атха сынгар Багъатырланы Харун ие болгъанды. Алтмышынчы джыллада ол ат Къасайланы Османнга берилгенди. Джангыртыу башланнганында, кетген ёмюрню тохсанынчы джылларында «Эресейни Джигити» деген ат дагъыда тогъуз адамгъа аталгъанды. Алай бла, Уллу Ата джурт къазауат бла байламлы миллетибизни 11 уланына къралыбызны эм баш аскер саугъасы берилгенди – Джигитни алтын джулдузу.
Аскер къаугъада Эресейни хауа чеклерин сакълагъан ётгюр лётчик-снайпер, генерал-майор Боташланы Къанамат уллу джигитлик этиб ёлгенди. Анга Эресейни Президенти Владимир Путин «Эресей Федерацияны Джигити» деген атны бергенди.
Алай бла, бюгюнлюкде бизни джигитлерибизни саны 12-ге джетгенди. Бизнича адам саны аз болгъан миллетни ичинден анча Джигит чыкъгъаны бла ким да ёхтемленирге боллукъду.
– Баш муратыбыз Джигитлерибизни юсюнден эки тизгин бла хапарларын айтыб, ала миллетни эсинде джашагъанларын эмда мындан ары да джашарыкъларын билдириудю, – дейди газетни баш редактору Къоркъмазланы Салима. – Флэшмоб интернетге кетсе, ёсюб келген джаш тёлюбюз аны кёрмей къоярыкъ тюлдю. Ол зат джаш адамланы джюреклерин къозгъарыгъына сёз да джокъду. Бизни махтаулу тарихибиз джаш тёлюню учундургъан бла бирге, патриот сезимлени тамырландырлыкъды, Ата джуртха сюймекликни ёсдюрлюкдю. Иш этиб экитизгинлени коллективни тиширыулары окъуйдула – юслеринде аскер кёлеклери, башларында аскер бёрклери бла. Алайды, Хорламны Паркында Джигитлени эсгертмелерини къатында окъуладыла ала.
Назмуну Мамчуланы Дина джазгъанды.
Айтыргъа, аскер кийимлери бла «Къарачай» газетни къуллукъчулары Басманы юйюнден чыгъадыла. Аланы хар бирини къолунда къызыл гвоздикалары барды. Ала, ашыкъмай, Хорламны Паркына джетедиле, гокка хансланы Ата джуртларын къоруулай джан бергенлени эсгертмелерине саладыла. Андан сора Багъатырланы Харунну, Къасайланы Османны, Бадахланы Хамзатны, Биджиланы Солтан-Хамитни, Гербекланы Магомедни, Голаланы Джанибекни, Ижаланы Абдулланы, Къаракетланы Юнюсню, Хайыркъызланы Кичи-Батырны, Ёзденланы Дюгербийни, Чочуланы Харунну, Боташланы Къанаматны эсгертмелерини къатларында назмуланы окъуб, гокка хансланы саладыла.
Башха миллетлени Джигитлерини эсгертмелерини къатында да тохтаб, алагъа да сый бередиле.
Энди флешмобха къошулгъанланы атларын да айтайыкъ: Къоркъмазланы Салима, Мамчуланы Дина, Хубийланы Фатима, Байрамкъулланы Зульфия, Байчораланы Алина, Эбзеланы Аминат.
Уллу къралыбыз, кесинден озуб, Европаны къралларын да къутхаргъанды фашист эминадан. Уллу Хорламны 80-джыллыгъын Эресей къой эсенг, кеслерин тюзлюкню джакъчысына санагъан къралла барысы да белгилерикдиле. Ол байрамгъа барыбыз да къууанч бла джетейик.
Къарачайны Джигитлери
Днепрден ётюб барады Харун,
Тыярыкъды къанлы джауну ол джолун.
Этер ючюн джауну ийманын тубан,
Турду ёрге партизан башчы Осман.
Хамзат джауну алгъанды да ышаннга,
Ата джуртун ийнакълатханды тангнга.
Солтан-Хамид къарачайча сермейди,
Немчаланы тёрт джанына силдейди.
Гербек улу ётгюрлени бириди,
Къоркъуу-юркюу деген андан кериди.
Темир къуш бла уугъа баргъан Джанибек,
Башха болмай, санынг къурчду,
джанынг бек.
Абдуллады джанын салмагъан артха,
Окъ джауса да, тохтамай баргъан алгъа.
Ётгюр Юнюс, Беларусну джакъладынг,
Мингле бла адамланы сакъладынг.
Дюгербийди джау ичине атланнган,
Тахса билиб, ызына терк айланнган.
Кичи-Батыр тау Марадан чыкъгъанды,
Фашистлени экеу-ючеу джыкъгъанды.
Чочуланы Харун ишин билгенди,
Джауну сюрюб, кюн батханнга киргенди.
***
Джигитлени джигитиди Къанамат –
Деу Эресей джаш тёлюге аманат.
Маралланы Ина.
