Къарачай районну Ташкёпюр элини джарыкълыкъ юйюню «Чолпан» тепсеу ансамбли элине, районуна да махтау-сый да келтиргенди.

Ол Эресейни «Кавказны халкъларыны тепсеулери» деген биринчи чемпионатында II-чи дараджалы лауреат болгъанды.
Чемпионат быйыл арттотур (апрель) айны 6-да Ставрополь шахарда бардырылгъанды. Кеслерини фахмуларын, хунерликлерин кёргюзюрге келген тепсеучюле бла коллективлени саны учсуз-къыйырсыз эди, деген джангыллыкъ тюлдю. Хар коллектив кесини тепсеулери, кийимлери бла да башхаланы эниклемезге кюрешгенди. Байрамгъа келгенле омакъ кийиннген къызла бла джашланы тепсегенлеринден кёз алмай къарагъандыла, тюрлю-тюрлю тартыула адамланы джюрек къылларын къозгъагъандыла.
Бу тукъум фестивалла, айхай да, миллетлени ичинде фахмулары болгъан адамланы ачыкъларгъа мадар бередиле. Аны бла бирге, хунерлик иш бла кюрешгенлени арасында шохлукъ джаратылады, сынам бла алмашыныугъа да джол ачылады. Лауреат атха ие болур ючюн, хар бири да бютеу кючюн-къарыуун салыб кюрешеди. Быллай фестивалланы кёзюуюнде тюрлю-тюрлю джангы проектле джаратыладыла.
Жюрини къурамына маданият бла санатны белгили къуллукъчулары, эстраданы, театрны, кинону джулдузлары киргендиле. Ала игилени ичинден эм игилени сайлагъандыла.
Фестивалны баш мураты сабийле бла джаш адамланы фахмуларын ачыкълау бла аланы ёсдюрюуге болушлукъ этиу болгъанын чертгендиле байрамны къурагъанла.