Черкесскеде «Джашауну оту» деген акция бардырылгъанды. Бу магъаналы иш сюекни джилигин бериуге багъышланнганды.

Айтыргъа, быйыл арттотур (апрель) айны 10-да Махтауну аллеясында Къан къуюучу республикан аралыкъгъа дери келгендиле кеслерини сюек джиликлерин берирге излеген донорла.
Республиканы джамагъаты бирикмеклик, таукеллик да танытханларын чертерге тыйыншлыды. Ол кюн 43 адам сюек джиликни донорларыны федерал регистрине киргенди, 40 адам да къан бергенди.
Эстафета халда бардырылгъан сууаблыкъ иш кесини джумушун бир кюннге тындырыб къоймагъанды. Бу сууаблыкъ иш эки ыйыкъгъа созуллукъду. Ол себебден къошулургъа излегеннге джол ачыкъды. Онкология эмда къан бла байламлы аурууладан инджилгенлеге сюекни джилиги уллу болушлукъ этеди. Аны эсге алыб, бу затны юсюнде донорлукъ этгенле джашауну отуна джаркъала атадыла. Джашауну оту джукъланмаз ючюн, халал джюрекли адамла кеслерини эм багъалы затларындан юлюш этедиле.
Бу къауумну тизгинине къошулургъа излегенле саулукълу адамла болургъа керекдиле, аланы джыллары 18-ден 35-ге дери болургъа тыйыншлыды. Саулугъу да болгъан, джылы да келишген адам, паспортун эмда СНИЛС-ни да алыб, республиканы къан къуюучу аралыгъыны эшиклерин таукел ачаргъа боллукъду.
Бу магъаналы сууаблыкъ ишни къурагъанланы баш муратлары сюек джиликни донорларын кёбейтиудю, ауругъан адамлагъа болушлукъ табдырыуду, 2025-чи джылны аягъына донорланы санын къралда 500000 адамгъа джетдириудю.