Уллу Хорламны 80-джыллыгъына джууукълашханбыз.

Бюгюнлюкде республиканы шахарлары бла районларында Уллу Ата джурт къазауат бла байламлы эсгертмелеге ремонт этиу эмда аланы тёгереклерин джарашдырыу къызыу джюрюш бла барады. Эсгертмеледе атлары джазылгъан джигитлерибиз ёсюб келген тёлюлеге Ата джуртха халал къуллукъ этиуню юлгюсюдюле.
– Эсгертмелени кёбюсю сынгар архитектура объект болуб къалмай, ётгюр аскерчилени ахыр топуракъ юлюш табхан джерлериди. Хар эсгертме тарихни сыйлы белгисиди, уллу къыйынлыкъны, зарауатлыкъны китабыны бир бетиди, керти джигитликни, джуртха сюймекликни тилсиз шагъатыды.
Биз, бюгюннгю джарыкъ кюнюбюз ючюн джан бергенлеге сый бериб къоймай, урушну ветеранларыны алларында баш иебиз, дунияны от бла джалындан сакълагъанларын чертебиз. Аны бла бирге айтыргъа излейбиз: уллу тёлюлени юлгюлери бла барыб, бюгюннгю джаш адамла, аскер къаугъагъа таукел къошулуб, деу къралыбызны къоркъуусузлугъун сакълайдыла. Ала этген джигитлик да тарихде энчи орун алгъанды.
– Бизни ызыбыздан келгенле тарихибизден тюз эмда толу хапарлы болургъа керекдиле. Къазауатны, джигитлени, хатерсиз сермешиулени, азатлыкъ ючюн кюрешни юсюнден биз билгенибизни айтыргъа борчлубуз. Бизни сабийлерибизге не болгъанын эмда не бола тургъанын къошмай-къоратмай айтайыкъ, – деб джазгъанды Темрез улу.