Ол къарауну кёзюуюнде ачыкъланнганына кёре, посёлокну арасы, 2 минг квадрат метр плитка тёшелиб, 40-дан артыкъ орам чыракъ тагъылыб, ариу джарашдырылгъанды. Бир игиси сабий площадка бла спорт площадка да аны къурамына киредиле. Аны себебли энди ала сабийле тюрлю-тюрлю оюнла, мини-футбол ойнаргъа сюйюб келиучю джерле болгъандыла. Хауа ариу кюнледе кемизли адамла да кёб заманларын бу аралыкъда солуй ётдюредиле.
«Бюгюн былайда посёлокну адамлары кеслерини гитче джуртларын бек багъалатханлары танылды. Ол зат мени бек къууандырды. Ала, посёлокну джарашдырыугъа аталыб бардырылгъан мамматлыкълагъа кеслерини разылыкълары бла чыгъыб, клумбаланы, тротуарланы ариулаб, тазалаб, алагъа гокка хансла орнатхандыла. Мен акъыл этгенден, хар адам тургъан, джашагъан джерин ма алай сюерге-багъалатыргъа, ариу тутаргъа, къайгъырыргъа керекди. Ол заманда властны не тюрлю хайырлы башламчылыгъы да джашау орунлу болмай къаллыкъ тюлдю», - деб джазгъанды артда Инстаграмында Къарачай-Черкесияны Башчысы Темрезланы Рашид.
Элледе «Шахар таблыкъла къурауну» проекти къралда Россия Федерацияны Президенти В. Путинни башламчылыгъы бла бардырылады. Бу ишни джашау орунлу этиуге «Бирикген Россия» деген политика партия да тири къошулады. Аны себебли, бютеу къралдача, бизни республикада да бу проект кенг джюрюш алгъанды. КъЧР-ни Башчысы Темрезланы Рашидни теджеую бла ол къозгъалыугъа бизни республика да тири къошулгъанды. Ол проектни толтурууну юсю бла быйылны ахырына дери Къарачай-Черкесияда 33 арбаз бла 7 парк джарашдырыллыкъды, аны кибик башха ишле этилликдиле.
