Алтотур (март) айны 18-де Кърым бла Севастополну Эресейни къурамына къошулгъанларыны 11-джыллыгъына аталыб, Къарачай-Черкесияда къууанч джыйылыула ётгендиле.
Ол кюннге аталыб, республиканы шахарлары бла районларында концертле, кёрмючле, социал сетледе флешмобла, викторинала бардырылгъандыла. Аны бла бирге, школлада «Разговоры о важном» деген дерсде Кърым бла Севастополну тарихинден, ала Эресейни къурамына киргенлерини юсюнден айтылгъанды.
А. Дауров атлы маданият бла санатланы колледжинде уа концерт бардырылгъанды. Анга КъЧР-ни Башчысы бла Правительствосуну Администрациясыны тамадасыны биринчи орунбасары Хубийланы Марат, КъЧР-ни Халкъ Джыйылыууну (Парламентини) депутатлары, республиканы Правительствосуну къуллукъчулары, джамагъат бирлешликлени келечилери, Черкесск шахарда джашагъанла дагъыда башхала къошулгъан эдиле.
Концерт башланырны аллы бла РФ-ны эмда КъЧР-ни кърал гимнлери согъулгъандыла. Ызы бла Хубийланы Марат джыйылгъан джамагъатха хошкелди сёзюн айтханды.
«Бюгюнлюкде Кърым бла Севастополь ёсюмню джолунда тири джюрюш бла баргъан регионладыла. Алада маданият, туризм, социал-экономика проектле джетишимли толтуруладыла. Эки регионда да, Эресейни къурамына къошулгъанлы бери, джыл сайын джангы школла, сабий садла, саулукъ сакълау учреждениеле ачыладыла, маданият эсгертмеле джангыртыладыла, инфраструктура ёсюм алады.
Кърым Эресейни къурамына къошулгъаныны байрамы халкъны кючю бирликде болгъанын эсибизге салгъанлай турлукъду. Бюгюнлюкде аскер къаугъагъа къошулгъанла Ата джуртубузну къоруулайдыла, джердешлерибизни эркинликлерин джакълайдыла, джигитлик танытадыла. Алай бла, къралыбызны географиясы кенгериб, аны къурамына Донбасс, Луганск, Запорожье, Херсон да къошулгъандыла. Ол бары да къралыбызны Президенти бла аны аскерлерини кючлери бла болгъанды. Биз Президентибизге ышанабыз, къралыбыз бла ёхтемленебиз. Барыгъызны да бу тарих магъаналы байрам бла алгъышлайма», – дегенди Хубийланы Марат.
Концертде республикабызны белгили артистлери Ата джуртха сюймекликни танытхан джырла бла джыйылгъанланы къууандыргъандыла.
Кърым бла Севастополну Эресейни къурамына къошулгъанларына аталгъан къууанч ишле бардырыу бизни республикада 2014-чю джылдан бери ашхы адет болгъанды.
САЛПАГЪАРЛАНЫ Умар.
