Ёзденланы Маринаны, Асланны къызыны, этген ишин региондан тышында да иги биледиле.

Аны хар этген затында сюймеклиги, ата-бабабыздан келген ашхы адетлеге терен эс бёлгени танылыб турады.
Ол эски къарачай кийизлени унутулуб тургъан технологиясын джангыртыб, адамлагъа ачыкъ этгенди. Аны къол ишлери кёб тюрлю сейир оюула бла джасалыбдыла.
Марина 1982-чи джыл элия (июль) айны 12-де Гитче Къарачай районну Ючкекен элинде туугъанды. Школну бошаб, институтну да тауусуб, кесин бусагъатдагъы усталыгъына толу береди.
2016-чы джыл Москвада «Молодость России» деген бютеу Эресейде бардырылгъан кёрмючге къошулгъанды. Аны ол джыл Эресейни Суратчыларыны союзуну къурамына алгъандыла. Фахмулу къыз андан сора да джаш тёлюню арасында Эресей Федерацияны Маданият министерствосуну стипендиясын алады. Анга Джамагъат мюкюл этген академияны «Золотые руки» деген дипломун бергендиле. Саугъаларыны арасында Эресейни Суратчыларыны союзуну кюмюш медалы, Къарачай-Черкес Республиканы маданият министрини Бюсюреу къагъыты эмда башха кърал саугъалары бардыла. Кёб болмай анга «Къарачай-Черкес Республиканы махтаулу суратчысы» деген сыйлы ат аталгъанды.
Марина 2013-чю джылдан бюгюнлюкге дери шахар, республикан, регионла арасы, кърал эмда къралла арасы кёрмючлени ишлерине къошулгъанлай турады.
АЛЧАКЪЛАНЫ Хусей.