Джюрегини къыллары джырлай, джумушакъ, татлы тилде сёлеше, сабийлеге ашхылыкъ келтирген огъурлу аналаны бириди Чомаланы Шамилни къызы, Къасайланы Зинхара. Ол, джашауун гитчечиклеге атаб, Сары-Тюзде сабий садда 40 джылгъа джууукъ заманны ишлегенди.
1981-чи джылдан башлаб, элни къыйырында бир юйде къуралгъан сабий садда сабийлеге къараб тургъанды. Кеси от этиб юйню джылытыб, ушхууур, татлы бёрекчикле, башха тюрлю хантла этиб, балаланы джарсытмазгъа кюрешгенди. Юйюнден кёгетле элтиб ашатыб тургъанды. Бек гитчечик болуб, ашаргъа излемеген болса, аны ушхууурун ары салыб, бир кесекден джылытыб, ашатханды. Анда бир джыл бла алты ай толгъан сабий да болгъанды. Ол аланы хар бирине энчи къараб, кесиникилеча кёргенди. Барын да ашатыб тойдуруб, джукълатыб, ала бла бирге ойнаб, аланы ашаргъа, олтурургъа, кеслерин тута билирге юретиб кюрешгенди. Гитче джашын юйюнде къояр мадары болмай, сыртына къысыб алыб барыб, сабий садда сабийле бла тутуб, алай ишлеб тургъанды.
Анга санэпидемстанциядан, башха джерледен комиссияла келиб къараб, хар нени тинтиб, кемлик табмай, махтау сёзле айтыб кетгендиле. Хар келгенлери сайын Зинхараны сауутлары, хант юйюню ичи да джылтырайдыла, сабийле ойнагъан джер тазады, деб кетиб тургъандыла. Ол ишлеген заманны ичинде, ашарыкъ неда кёгет джарашмай, сабий ауругъан болмагъанды. Аллай уллу джетишим Зинхараны терен къайгъырыуунданды, къыйыныны кючюнденди. Ол сабийлеге толу берилиб, кёлю бла ишлегенди. Аны юсюнден сабийлени аналары да айтханлай тургъандыла. Ала, аны бек тёзюмлюге, сакъгъа, джууаблылыкъны терен сезгеннге, фахмусун, билимин, кючюн аямай кюрешгеннге санагъандыла.
Аланы ол юйден, мекямны халы аман болуб кетергенлеринде, «Ромашка» деген сабий садха кёчедиле. Таулу тиширыу былайда 12 джыл ишлеб, тыйыншлы солуугъа (пенсиягъа) чыкъгъанды.
Зинхараны ата юйю Ильич элдеди. Ол Сары-Тюз элде Къасайланы Ахмат бла джашауун бир этгенди. Алагъа юч джаш тууады. Ахмат ауушхандан сора, Зинхара сабийлери Муратха, Ахматха, Азаматха джангыз кеси къараб, алагъа школну бошатыб, баш билим алдырыб, ючюсюн да юйдегили этеди. Бу джигер тиширыу, сабий садда ишин тыйыншлы дараджада толтургъан бла къалмай, кесини сабийлерине къараргъа да заман табханды. Ала ючюсю да аламат юйдегиле къураб, бири Джёгетей Аягъында, экинчи Москвада, ючюнчю, юйюрню гитчеси, анасы бла бирге джашайдыла.
Джашла, усталыкъларын хайырландыра, тюрлю-тюрлю ишледе урунадыла. Зинхара бусагъатда, туудукъларына къууана, аланы ариу халиге юрете, джашайды.
Ол сабийлерине къарагъан анала, анга бусагъатда да бюсюреу эте, разылыкъларын билдиредиле. Ма аллай джигит, джигер, огъурлу сюймекликден толгъан тиширыуду Къасайланы Зинхара.
УЗЕИРЛАНЫ Хусей.
