Джигит абычар Иван Иванович Лободин Уллу Ата джурт къазауатны заманында гитлерчи фашистле бла джанын-къанын аямай къазауат этгенди.
Ол 1942-чи джыл ачы урушланы биринде ёлгенди. Анга, алайда кёргюзген джигитлиги ючюн, «Совет Союзну Джигити» деген сыйлы ат аталгъанды.
Иван 1900-чу джыл алтотур (март) айны 24-де Саратов областны Пугачёв районуну Старая Порубежка деген элинде туугъанды. 1918-чи джылдан Къызыл Аскерни сафларында къуллукъ этгенди. 1919-чу джыл коммунист партияны къурамына киргенди. Граждан къазауатда 25-чи Чапаевчи атыучу дивизияны къурамында взводну командири болуб къазауат этгенди. Польшада, Украинада, Орта Азияда болгъан урушлагъа къошулгъанды.
Ол Киевде баш аскер-политика курсланы бошагъанды. Уллу Ата джурт къазауатны аллы бла Гитче Къарачай районда Киров атлы ат-аскер заводха башчылыкъ этиб тургъанды.
Иван Лободин 1941-чи джыл къачда Къыбыла фронтда болгъанды. Ол подполковник чында, полкну командири болуб, уллу Донбасс-Ростов къоруулау аскер операцияда керти джигитлик танытханды. Аны атлы аскер полку, бир къаты урушда, бизни аскерлени къыйын джерден чыгъарларына таб болум къурай, джауну 13 танкасын кюйдюргенди.
Лободинни полку 1941-чи джыл аууз-герги (октябрь) айда Ростов областны Копани хуторуну къатында орналады. Алайда джау 70 танкасы бла алты кере чабыуул этеди. Иван Ивановични аскери джауну ызына ыхтырыб турады, кюнортагъа дери джауну 17 танкасын кюйдюреди, бир батальонну да къурутады. Ачы урушда Иван, пулемётдан, ызы бла автоматдан атыб, кёб немчаны къырады. Окълары бошалгъанында, къылычын алыб чабады джаугъа. Алай а джауну огъу тийиб ёледи.
Ол ёлгенден сора, 1942-чи джыл хычаман (май) айны 5-де, урушлада кёргюзген джигитлиги ючюн, Лободиннге «Совет Союзну Джигити» деген ат аталады.
Иван Ивановични кърал берген саугъаларыны арасында Ленинни ордени, Къызыл Байракъны эки ордени, Таджик ССР-ни Урунууну Къызыл байрагъыны ордени, башха саугъалары болгъанды.
Анга атаб, Старая Порубежка элде школну къабыргъасында мемориал къанга ачхандыла. Черкесскеде, Пугачёв шахарда, Покровское элде Джигитлени Аллеяларында аны бюстлары бардыла. Старая Порубежка эл бла Черкесск шахарны бирер орамлары аны атын джюрютедиле. Ростов областны Неклиновский районунда Советка элни школуна аны атын атагъандыла, бюстун да салгъандыла.
Халкъны, Джуртну сакълай джан берген Джигитлени атлары унутуллукъ тюлдю, тёлюлени эслеринде сакъланныкъды.
ЛЕПШОКЪЛАНЫ Хусеин.
