Биринчи сёз КъЧР-ни Премьер-министри Озов Асланнга берилди. Ол, къууанч джыйылыуда Къарачай-Черкесияны Башчысы Темрезланы Рашидни атындан сёлеше, бу арт джыллада республикада сабий садла ишлеуге уллу эс бёлюннгенин, ол адет къайсы бирибизни да къууандыргъан ашхы адет болгъанын айтды. Россия Федерацияны Президенти В. Путинни май указларын толтурууну юсю бла Къарачай-Черкесияда 3 джылдан 7 джылгъа дери сабийлени садикле бла баджарыуну проблемасы толусу бла толгъанын разы болуб чертди.
«200 орну болгъан бу джангы сабий учреждение Гитче Къарачай районда сабийлени сад кереклилерин толу баджарлыкъды. Кёблени къайгъырыулары эмда болушлукълары бла Гитче Къарачай районну администрациясы бюгюнню излемлерине толу келишген аламат сабий сад ишлегенди. Мында сабийле, не кереклилерин да табыб, зауукълу турлукъдула», - деди Озов Аслан.
Республиканы Правительствосуну Председатели джангы сабий садны къуллукъчулары сабийлени бирча саулукълу, ишленмекли болуб ёсдюрюр джанындан болуб турлукъларына ийнаннганын билдире, ол аны коллективине да, сабийлени аталары бла аналарына да джетишимле, ашхылыкъла эмда насыб теджеди.
КъЧР-ни Парламентини Председатели Иванов Александр да ол къууанч джыйылыугъа келгенлени бу бютеу Гитче Къарачай районнга уллу магъанасы болгъан иш бла – элде джангы сабий сад ишлениб, хайырланыугъа берилгени бла – джылы алгъышлады. Бусагъат заманны излемлерин толу толтургъан бу аламат сабий сад анга джюрюгенлени мында ётдюрген джыллары аланы эслеринде эм зауукълу ётдюрген джылларыча къаллыкъларына ышаннганын билдирди.
Ючкекен элни Къамиш Къулакъ деген тийресинде хайырланыугъа джангы сабий сад, башында чертилгенича, 200 сабийге джораланыб ишленнгенди. Ол кеси да билим бериуню бусагъатхы комплексини бир кесегиди. Аны къурамына «Радуга» деген сабий сад бла бирге былтыр сентябрны 1-де хайырланыугъа берилген, 408 сохтагъа орну болгъан орта школ да киреди. Ючкекенни Къамиш Къулакъ деген тийресинде бу комплекс Къарачай-Черкесияны Башчысы Темрезланы Рашидни оноуу бла 2014-чю джыл ишлениб башлагъан эди.
«Радуга» 3250 квадратметр джерни алады. Аны 8 группагъа джораланнган кенг эмда таб джарашдырылгъан аламат комнаталары барды. Алада сабийлеге зауукълу турурча, ёсерча, билим алырча болумла къуралгъандыла.
Садикни уллулугъу 5000 квадратметр болгъан арбазында да ариу беседкала ишленнгендиле. Ойнаргъа керекли материалла бардыла. Сабий джыгъылса, джугъу ачымаз, хата джетмез ючюн, тюблерине джумушакъ материалла тёшелген 9 ойнаучу площадка къуралгъанды. Къонакъла аланы барына да сюйюб, разы болуб къарадыла.
Эсигизге салабыз: арт 5 джылда Гитче Къарачай районда «Радуга» хайырланыугъа тёртюнчю сабий учреждение болуб берилгенди.
Хубийланы Абу-Хасан.
