Имам Абу Ханифа атлы Къарачай-Черкес ислам институтну мекямыны къабыргъасына бу институтну къурагъан, аны биринчи ректору болгъан Бостанланы Исмаил хаджиге кёб болмай мемориал къанга салгъандыла.
Ётген байрым кюн эсгертмени ачхан сагъатда институтну арбазына кёб адам джыйылгъан эди: аны окъуучулары бла устазлары, дин башчыла, алайгъа намазгъа джюрюгенле, Исмаил хаджини эт-джен адамлары, тюз шахарчыла, республиканы башха джерлеринден келген къонакъла.
– Багъалы джамагъат, мындан алда муфтиятда да оноу этиб, кърал оноучуладан да кёл табыб, имам Абу Ханифа атлы Къарачай-Черкес ислам институтубузда Бостанланы Исмаил хаджиге эсгертме салгъанбыз. Бюгюн аны ачаргъа джыйылгъанбыз, – деб башлады джыйылыуну Къарачай-Черкесияны муфтийи Эриккенланы Мухаммат хаджи. – Кесигиз билесиз, институтну къурагъан, аны биринчи ректору болуб тургъан Исмаил хаджи болгъанды. Къарачай-Черкесияда, Ставрополь крайдада да ислам динни джайыугъа, айнытыугъа уллу юлюш къошхан адам эди. Тышында Бухарада, Ташкентде окъуб келиб, бютеу къралда биринчилени бири болуб, бу институтну алай ачхан эди. Окъуу процессни джарашдырыб, талай джылны анга башчылыкъ этиб да тургъанды. Ол, муфтий Бердиланы Исмаил хаджи, артдаракъ Катчиланы Ибрахим хаджи – бу адамла бизни республикада динибизни айнытыугъа, аны сыйын кёлтюрюуге уллу къыйын салгъан адамладыла. Ийнаныгъыз, мен бу затланы кесим кёзюм бла кёрюб, сынаб, билиб айтама. Аллахны аллында саугъаларын табарыкъдыла ала, инша Аллах. Бостан улу Исмаил хаджи, джандетли болсун, терен билими болгъан алим эди, фахмулу устаз эди, ашхы адам эди, келигиз, анга багъышлаб бир дууа этейик, – деб дууа этдирди.
Аны ызындан Бостанланы тукъумну тамадасы Хамитге сёз берилгенинде, ол да джылы сёлешди:
– Ашхылыкъ унутулмайды, Исмаил хаджи сыйлы динибизни джайыугъа уллу къыйын салгъан эди. Бютюн да бек джаш тёлюню диннге къайтарыугъа айырыб эс бёле эди ол. Аны къолунда окъугъан сохтала кеслери элледе имамчылыкъ этиб тургъанларын кёребиз, билебиз. Динни кесигиз билесиз, ариу юлгю бла джайыуну юсюнден Сыйлы Файгъамбарыбыз (гъ.с.) да айтыучу болгъанды. Исмаил хаджини, анычаланы юлгюлери бла ненча джаш адам терсейир джеринде тюз джолгъа тюшген болур. Алайды да, аныча адам къуру кесини тукъумуну тюл, бютеу миллетни, бютеу республикабызны да сыйыдыла, махтауудула. Сау болсун, бу ишни этдирген муфтийибиз Эриккен улу Мухаммат хаджи, анга болушхан джашла бары да. Аллахны разылыгъын табсынла.
– Исмаил хаджини джарыкъ сыфаты бизни джюреклерибизде джашайды. Кёб къыйыны барды бу институтда. Керти фахмулу адам эди кеси да: дин къуллукъчуча, башчыча, устазча да. Къысха заманны ичине коллектив къураб, бирикдириб къойгъан эди, – деб джамагъатны аллында хапар айтды институтну проректору болуб ишлеген Семенланы (Биджиланы) Мариям хаджи. Студентле, устазла да бирча сыйын кёре эдиле аны. Ол окъутхан сохтала бюгюнлюкде республикабызда, Дагъыстанда, Ставрополь крайда, Къабарты-Малкъарда, Эресейни башха джерлеринде, таб, Узбекистанда, Таджикистанда да ишлейдиле.
Дагъыда Исмаил хаджиге сый бериб сёлешдиле «Къарачай – алан халкъ» бирлешликни тамадасыны орунбасары Боташланы Сулайман хаджи, институтну бюгюннгю ректору Къайытланы Ахмат хаджи, Бостан улуну туугъан къарнашы Азрет эмда башхала. Юй бийчеси Айшат юйдегини, бирси ахлуланы атларындан бу ишни къурагъанлагъа разылыгъын билдирди.
Ёзденланы Якъуб.
