Быйыл Ата джуртну къоруулаучуну джылы болуб баямланнганы эмда Уллу Хорламгъа 80 джыл болгъаны бла байламлы саулай Эресейни окъуу учреждениелеринде анга аталыб патриотлукъ дерсле, эришиуле, кёб тюрлю джыйылыула бардырыладыла.
Ол ишле бизни барыбызны да тарих эсибизни джангыртыргъа себеблик этгенлери хакъды.
Алайды да, мындан алда Ючкекенни Джарыкълыкъ къаласында Эресей Федерацияны Джигити Ижаланы Абдулла туугъанлы 105 джыл толгъанына аталыб джыйылыу болду. Аны Ючкекен элни 1-чи номерли школуну башчылары бла сохталары къурагъан эдиле. Джыйылыугъа устазла бла сохталадан сора да, Гитче Къарачай районну башчысы – Советини председатели Эриккенланы Рамазан, Ючкекен элни башчысы Семенланы Анзор, районну окъуу бёлюмюню къуллукъчулары, «Къарачай – алан халкъ» джамагъат бирлешликни келечилери Алийланы Мухтар, Боташланы Сулайман, Эриккенланы Арасул, «Навигаторы детства» атлы проектни бизни регионда келечиси Борлакъланы Людмила, Эресейни Джигити Ижа улуну эт-джен адамлары, урунууну ветераны Чомаланы Алий, Джигитни джен адамы Ижаланы Магомед, СВО-ну ветеранлары Джуккаланы Мусалим, Акъбайланы Рашид, Орусланы Руслан, журналистле эмда элчиле келген эдиле.
Адетдеча, къралны эмда республикабызны гимнлери бла джыйылыуну ачдыла. Андан сора, экранда Уллу Ата джурт къазауатны юсюнден документли фильмден юзюкле, Эресей Федерацияны Джигитлерини эмда СВО-да ётгюрлюкню юлгюсюн танытхан уланларыбызны суратларын кёргюздюле. Джыйылыуну бардыргъан сохтала, Джигитни джашауундан, уруш джолундан хапар айтыб, келген къонакъланы шагъырей этдиле.
Школну директору Кипкеланы Османны къызы Катерина, джыйылгъанланы алларына чыгъыб, хошкелди сёз айтхандан сора, келген къонакълагъа джюрек разылыгъын да билдирди.
– Бизни школубуз Къарачайны махтаулу уланы, батыр аскерчи, Эресейни Джигити Ижаланы Абдулланы атын джюрютеди. Ол барыбызгъа да сыйды. Аллай адамларыбызны ётген уруш джоллары бюгюнлюкде школда окъутхан сохталарыбызгъа патриотлукъну, Ата джуртха къуллукъ этиуню юлгюсюдюле. Ол уланларыбызны Уллу Ата джурт къазауатда этген джигитликлерин толу айтыб бошаргъа кишини къолундан да келиб бошамаз. Алай болса да, бюгюнлюкде джаш тёлюню аллында аланы джигитликлерин къатлагъан, ызларын бардыргъан джашларыбызны да эшитсек, джюрегибиз къууанады. Къралыбызны джакъларгъа, сюерге, патриот сезимлени алагъа сингдирирге борч этиб салгъанбыз кесибизге, – деди школну директору Катерина Османовна.
СВО-ну ветераны Акъбайланы Рашид да, бу джыйылыуну къурагъанлагъа джюрек разылыгъын билдириб, школну сохталарына да Ата джуртуна къуллукъ этиу эркишиге эм уллу сый келтиргенин, къыйын кёзюуде да анга кертилей къалыргъа керек болгъанын чертиб айтды. Келген къонакъла да быллай джыйылыуланы хаман эте турургъа кереклисин чертиб сёлешдиле.
Школну сохталары бу байрамгъа деменгили хазырланнганлары таныла эди. Нек дегенде, ала, сахнада тамам сынамлы артистлеча кеслерин уста джюрюте, сахна оюнла кёргюздюле, аскер джырла джырладыла, назмула айтдыла.
Барыбыз да билгенден, мындан алда талай джылны Волгоград шахарда джангы къуралгъан тийрелени бирини орамына, Эресейни Джигити Ижаланы Абдулланы аты аталгъан эди. Ол уллу джумушха къошулгъан Волгоград область Думаны депутаты, 5-чи номерли школуну директору Тропкина Лариса Александровна да, онлайн мадарла бла ючкекенчилеге бюсюреу-сыпас этди.
Джыйылыуда джырчы Эриккенланы Арасул, Джигитлени ёсдюрген аналагъа кёб алгъыш айтыб, сый бериб, аналагъа аталгъан джырын джырлады.
Джыйылыуну аягъында Уллу Ата джурт къазауатда ёлгенлеге аталгъан Ючкекендеги эсгертмелеге гокка хансла салдыла.
БОКАЙЛАНЫ Фатима.
