Байрым (февраль) айны 4-де Черкесскеде джашагъан 76 джыл болгъан бир тиширыу полициягъа тарыгъа баргъанды.

Ол кесин аманлыкъчылагъа алдатханын айтханды.
Амманы хапарына кёре, башил (январь) айны 22-де анга биреулен, мессенджер бла къонгурау къагъыб: «Мен джорукъ сакълаучу органлада ишлейме, бусагъатда аманлыкъчыла сени счётунгда ачхангы кеслерине кёчюрюрге дыгалас эте турадыла, аладан алгъа сомларынгы къоркъуусуз счётха кёчюр», – дегенди.
Хыйлачыгъа ийнаныб, ол юретгенча этиб, ол тиширыу 2 218 000 сомну кесек-кесек аманлыкъчы айтхан «къоркъуусуз счётха» телефон бла кёчюргенди.
Бусагъатда амманы тарыгъыуу бла терслеу иш ачылгъанды. Аны ачхасын ётюрюк бла алгъан адамны ачыкълар мадарла этиле турадыла.
Къарачай-Черкесияны Ич ишлени хакъындан министерствосу джамагъатны сакъ болургъа чакъырады, аманлыкъчыла банкда сакъланнган ачханы «къоркъуусуз счётха» кёчюрюрге керекди деб алдаргъа ёч болгъанларын эсгертеди. Кертиси бла уа, аллай къоркъуусуз счёт джокъду. Ким болса да алай айта башласа, ушакъны тохтатыргъа керекди. Къайгъылы болгъан адам, эрлай огъуна банкга къонгурау къагъыб, хапар соруб, кесини счётундан билирге боллукъду.
Джорукъ сакълаучу органланы къуллукъчулары телефон бла не оператив, не тинтиу ишле бардырмагъанларын хар адам да билирге керекди.
Мен анда-мында ишлейме деб, сёлешген болса, аны атын, атасыны атын, тукъумун, къуллугъун соруб, айтхан организациясына къонгурау къагъыб, керти да анда аллай адам ишлегени бла къалгъанын билирге да боллукъду.

Кумукова Рамиля,
КъЧР-ни МВД-ны пресс-къуллукъчусу.