Джюрегини ауазы тёгерекге джылыу тёге, тутхан ишин сый бла толтургъан къанатлы джашларыбызны бириди Къоркъмазланы Хыйсаны джашы Ахмат. Аны мийикде учхан огъур кючюню къушу къанат кере, хауада бурулуб ойнайды.
Атасы Къоркъмазланы Османны джашы Хыйса да халкъ сыйлагъан, керти адам болгъанды. Ол «Джёгетей» совхозда малда джигер урунуб, атын сый бла айтдырыб тургъанды. Кёчгюнчюлюкде, Къыргъызияда трактористликге окъуб, анда атын иги бла айтдыра, ишлеб, таукел алгъа баргъанды. Артда машина-трактор паркны тамадасы къуллукъну сый бла толтургъанды. Уллу мюлкню техникасын керекли дараджада тутуб, анга салыннган борчну тыйыншлысыча толтуруб талай саугъа алгъанды.
Анасы Айбазланы Хасанны къызы Нафисат да алгъы бурун совхозда ишлеб атын махтау бла айтдыргъанды. Артда, сабийле аслам болгъанларында, джашауун джети баласын халкъны ашхы адетлерини тамалында, ариу халили этиб ёсдюрюуге атагъанды.
Ахмат 1957-чи джыл элия (июль) айны 15-де Элтаркъачда Хыйсаны миллетибизни адебин-намысын сакълагъан, урунууну сюйген ашхы юйдегисинде туугъанды. Элтаркъач школда 2 классны окъугъандан сора, Джёгетейде 6 классны бошаб, Гитче Къарачайгъа барыб, Красный Курган элде он классны тауусханды. Ол, школда иги окъуб, устазланы айтханларын эте, тенгчиклерине да болуша, атын иги бла айтдыргъанды. Заманы джетиб, 1975-чи джыл аскерге барыб, Германияда сыйлы борчун толтуруб къайтады. Ол заманда Къазахстанда граждан авиацияны учаргъа юретген баш училищеси ачылады. Ахмат 1978-чи джыл ары барыб, экзаменле бериб, училищеге киреди. Анда инженер билим бергендиле, пилотлукъгъа, «Як-40» маркалы самолётха окъутхандыла. Бизни джердешибиз аны 1984-чю джыл джетишимли тауусады. Ол «Як-40» самолётну джюрютюрге юрениб чыгъады. Ол заманда джаш усталаны къралны бек керекли джерлерине ишге ийгендиле. Ахмат Сибирге тюшеди. 1984-чю джыл анда Ханты-Мансийск автоном округда аэродромда ишлеб башлайды. Аны, фахмулу, билимли, тири лётчикни, бир кесекден юч мотору болгъан, пассажирлени ташыгъан «Як-40» самолётну командири этедиле. Ол аэродромда тюрлю-тюрлю ишлеге джораланнган 17 самолёт тургъанды. Аланы бири бла къуру министрле хайырланнгандыла. 16-дан 2-си джюк ташыучу, ала бла джюк ташыгъандыла, асламысына почта элтгендиле, къалгъанлары да адамланы элтиучю болгъандыла. Ахмат бир кере ичи ачхадан тыкъ-тыкълама болуб тургъан бир самолётну Тюменден, Ханты-Мансийскийге учургъаныны юсюнден да ышарыб хапар айтады.
Ол «Як-40» самолёт бла адамланы Омск, Свердловск, Уфа, Львов, Краснодар, Новый Уренгой дагъыда башха шахарлагъа элтиб тургъанды. Джай кёзюуде ала джылы джерлеге барыб ишлегендиле, солугъандыла. Аланы ары элтиб, сууукъ тюшсе ызларына келтириб тургъанды. Алайыны лётчиклерини бир джылгъа 500 кере учханлары болгъанды. Ол бек мийик джетишимди, башха аэродромлада алай эталмагъандыла.
Аны тышында вахта бла барыб, газ, нефть чыгъаргъан къауум адамны ары элтиб, андагъыланы бери келтириб тургъанды. Керек болса, анда сакълаб, нефть бла кюрешгенлени джумушларына да къарагъанды. Вахтачыланы Львовгъа, Харьковгъа, Николаевкагъа дагъыда башха шахарлагъа элтгенди. Бир джерге элтиб, алайдагъыланы алыб, башха аэродромгъа учуб, алайда да къошуб, самолёт толса, алыб кетиб бырлыкъ джерлерине элтиб тургъанды. Аллай иш талай кюнню ичинде баджарылгъанды. Ол учхан джерлеге джол болмагъанды. Джай тёгерекни суу басыб, къыш кюртден толуб тургъанды. Сёз ючюн, адамланы 100 километр узакълыкъгъа да самолёт элтгенди. Аллай джерлеге къысха-къысха учханды. Аны бир кюннге 6 рейс этгени да болгъанды.
Ол 17 самолётдан, джумушуна кёре, къайсын берселе, аны бла учуб тургъанды. Самолётда ол (командир), 2-чи пилот, бортмеханик учхандыла. Адамланы тынчлыкъларына эс бёлген, хар неге къарагъан бир неда эки къыз болгъанды.
Москвадан келген министрлени, башха кърал тамадаланы нефть чыкъгъан джерге элтгенди, алайдан башха шахарлагъа учуб, ала ишлерин толтурурча мадарла къурагъанлай тургъанды. Ахмат джигерликни, джигитликни юлгюсюн танытыб, алай бла 1991-чи джылгъа дери ишлегенди. Тюрлениулени заманы болуб, аланы аэродром да чачылыб, юйдегисин алыб юйюне, туугъан джуртуна, келгенди.
Ол бусагъатда энчи цех ачыб, сатыу-алыу бла кюрешеди. Кёб адамны джумушуна къарайды.
Лепшокъланы Хусеин.
