Республиканы ара шахарында Уллу Хорламны 80-джыллыгъы бла байламлы Хорламны паркын джангыдан джарашдырыб тебрегендиле.

Эм алгъа фашистледен Азатлагъан аскерчиге багъышланнган эсгертмеге ремонт этиб башлагъандыла.
Бу эсгертмени шахарны архитектору, скульптор Василий Маркин ишлегенди. Аны 1952-чи джыл къууанч халда ачхандыла.
– Сёзсюз да, былайы шахарда джашагъан адамланы эм сыйлы джерлериди. Анга сейирсинирге керек тюлдю, джер джюзюн фашист эминадан къутхаргъанланы эсгеребиз бери келсек, – дегенди Черкесскени мэри Алексей Баскаев. – Ол эсгертмени джангыртхан заманда мермер эмда сослан ташланы хайырландырлыкъбыз. Эсгертмеге, кече джаныб-джылтыраб турурча, лампала салынныкъдыла. Алай болса да, эсгертмени алгъын тюрсюню сакъланныкъды.
Хорламны паркында Черкесскеден урушха кетиб, анда джан берген эмда башсыз къалгъан 3,8 минг адамны аты джазылгъан эсгертме да барды. Анга да салынныкъдыла лампала.
Айтыргъа, паркны джангыртылмагъан джери къаллыкъ тюлдю. Кирген джерден башлаб, бютеу барын да джангы материалла бла джарашдырлыкъдыла. Айтыргъа, Махтауну аллеясында да джанарыкъдыла лампала, паркны ичине джангы плиткала тёшелликдиле. Кирген джерде узакъдан кёрюрча «Хорламны паркы» деб ариу джазыллыкъды – аны да лампала джарытырыкъдыла.