Озгъан солуу кюнледе Къарачай-Черкесияны Ич ишлени хакъындан министерствосуну Экстремизмге къаршчы кюрешни бардыргъан аралыгъыны къуллукъчулары административ законланы сакълаучу иш нёгерлери бла бирге Эресей Федерацияны кърал белгилерин сыйламагъан адамланы джууабха тартхандыла.

Черкесск шахарда бардырылгъан спорт эришиулени кёзюуюнде Эресей Федерацияны Гимни согъулгъанды, алайгъа джыйылгъанла бары сир къатханларында, иш этиб ёрге къобмагъанла болгъандыла. Эресей Федерацияны кърал белгисини сыйын кёрмеген алты адамгъа да Административ терслик этгенлени джууаблылыкъгъа тартыуну хакъындан кодексни 17.10-чу статьясыны тамалында протоколла джазылгъандыла.
МВД-ны къуллукъчулары алагъа законну-джорукъну айтыб юретгендиле.
Бир ыйыкъны алгъаракъ аллай терсликни башхала да этген эдиле. Ол заманда Административ терслик этгенлени джууаблылыкъгъа тартыуну хакъындан кодексни 17.10-чу статьясыны тамалында протоколла, джыллары 16-дан атлагъан эки къызгъа, 5.35-чи статьясыны тамалында да акъыл-балыкъ болмагъан бир къызны атасы бла анасына джазылгъан эдиле.
Алгъаракълада аллай иш хоншу регионда болгъан эди. Анда да РФ-ны Гимни согъулгъан кёзюуде бёлек сабий, аланы аталары, аналары бла бирге ёрге къобмай, къулакъларын джабханларында ауузгъа тюшген эдиле. Аланы бир къаууму иги эшитмеген эдик деб, бирсилери да кърал белгиле бла байламлы закондан хапарыбыз джокъду деб, баш алыргъа кюрешгендиле. Алай болса да, законну билген, билмеген да терс иши ючюн джууабха тартылмай къалмайды.
Сёзден, Эресей Федерацияны кърал белгилерин (Байракъ, Гимн, Герб) джорукъсуз джюрютген, аланы сыйларын кёрмеген адамлагъа 2000 – 3000 сом тазир салынады, ол терсликни джууаблы къуллукъчу этсе, анга салыннган тазирни ёлчеми 5000 – 7000 сом болады, организациягъа уа аллай иш ючюн 100000 – 150000 сом тёлерге керек боллукъду.
КъЧР-ни МВД-сы джамагъатны къралыбызны белгилерин сыйларгъа чакъырады, законну билмейбиз деб, киши джууаблылыкъдан къутулмазын эсгертеди.

 
{jcomments}