Эресейни Джазыучуларыны союзуну Къарачай-Черкес бёлюмюню кёб болмай отчёт-сайлау джыйылыуу болду. Ол Байрамукъланы Халимат атлы республикан миллет библиотеканы мекямында ётдю.

Къарачай-Черкес Республиканы Джазыучуларыны союзуну председатели Хубийланы Хызырны джашы Ислам, джыйылыуну ачыб, сюзюллюк ишлени тизими бла шагъырей этди. Республиканы шахарлары бла эллеринде джашагъан, Эресейни Джазыучуларыны къурамына кирген 91 адамдан джыйылыугъа 83 адам келгени да бардырылгъан ишни магъанасы уллу болгъанына шагъатлыкъды.
Айтыргъа, мадары болуб, бу ишден бир джанында къалыргъа излеген адам болмагъанды. Мекямын да тас этиб, кеси да чачылыб тургъан джазыучуланы регионал союзун эки джылны мындан алгъа джангыдан къураб, анга да эки джыл болджалгъа башчыгъа Хубийланы Хызырны джашы Ислам сайланнган эди. Союзну къагъытларындан башлаб, хар затын да заманны излемине кёре джарашдырыр ючюн, кёб иш этилгенди.
– Бизни баш борчубуз биригиу, кесибизни сау-эсен болгъаныбызны бегитиу эмда эки джылны ичинде къолубуздан келген ишни этиу болгъанды, – деди Хубийланы Ислам. – Эресейни Джазыучуларыны союзу бла къысха байламлы болгъанбыз, КъЧР-ни Джазыучуларыны союзу ишлеб тебрегенди, арабыздан талай джазыучу дунияларын ауушдурсала да, аланы саны аз болмагъанды. Эки джылны ичинде талай фахмулу адам Эресейни Джазыучуларыны союзуну къурамына киргенди. Джаш фахмуланы ачыкълар иннетде тюрлю-тюрлю хунерлик конкурсла бардырыб тебрегенбиз. Бу иш мындан ары да джюрюшюн сериуюн этмезге керекди.
Джыйылыугъа келгенле, Исламны сёзю бла дуниядан кетген джазыучуланы эсге тюшюре, ёрге туруб, бир такъыйкъаны шошлукъгъа бёлендиле.
Эки джылны ичинде айырылыб хунерлик ишде кеслерин танытханлагъа эмда союзну джумушларына тири къошулгъанлагъа Эресейни Джазыучуларыны союзуну эмда аны КъЧР-де бёлюмюню Хурмет грамоталарын берди Хубий улу.
Джыйылыуну къонагъы КъЧР-ни маданият министри Агирбов Зураб Замирович талай джазыучуну санагъат грамотала бла алгъышлады – ала озгъан джылда юбилейлери болгъанла эдиле.
КъЧР-ни Джазыучуларыны союзуну секретары Браткова Татьяна Николаевна да сёлешди. Ол эки джылны ичинде этилген ишлени арасында «Писатели Карачаево-Черкесии» деген джыйым китабны чыкъгъанын, аны юсю бла регионну джазыучулары Эресейни кёб джеринде, таб, андан тышында да белгили болгъанларын чертди. Эресейде кёб тюрлю джамагъат организация бла байламлылыкъ болгъаны да ашхы ишлени бириди. Аны кибик Эресейни шахарлары бла субъектлерини Джазыучуларыны союзлары бла да арада ангыламакълыкъ болгъанын да айтды ол.
Джыйылыуну ишине видео халда Эресейни Джазыучуларыны союзуну Правлениесини председатели Николай Федорович Иванов да къошулду.
– Къарачай-Черкесияны джазыучуларыны барысына да тутхан ишлеринде джетишимле теджейме, – деди Николай Федорович.
– Эки джылны ичине союз алгъа ашхы атламла этгенди. Хубийланы Ислам фахмулу, уллу къураучулукъ къудурети болгъан адам болгъанын танытханды. Биз бир-бирибизни ангылаб ишлегенбиз. Мындан ары да ол джолда барлыгъыбызгъа ишексизме эмда тюз оноу этеригигизге, кесигизге башчыгъа тыйыншлы адамны сайларыгъызгъа ийнанама.
Этилген ишге багъа бериб талай адам сёлешди. Ала барысы да Исламны башчылыгъы бла союз аякъ юсюне тургъанын, барлыкъ джолун тикирал белгилегенин чертдиле. Биз барыбыз да республикада эмда къралыбызда шохлукъну, къарнашлыкъны, мамырлыкъны бегитир ючюн кюреширге керекбиз, деген оюмну джаратханларын билдирдиле.
– Бизге юлешир зат джокъду. Башыбызда кёк да, джашагъан джерибиз да бирди, – деди Акъбайланы Халимат, Илиясны къызы. – Баш джумушубуз хунерлик кючюбюзню кёргюзюудю, Къарачай-Черкесияда кёб фахмулу адам джашагъанын, аланы къолларындан кёб зат келгенин ачыкълауду. Бизни джолубуз биргеди, ол заманда таймаздан алгъа барлыкъбыз.
Джазыучуну, къайсы миллетни келечиси болса да, эм уллу байлыгъы, къолунда саууту да тилиди. Тилин иги билгени себебли, къаламыны учу бла адамланы джюреклерине джол табарча чыгъармала джазыб, миллетини тин-иннет хазнасына юлюш къошады. Арт кёзюуде республиканы бир миллетинде болуб къалмай, хар биринде да бирча джарсыу кесине орун айыргъанды – ёсюб келген сабийле ана тиллеринде сёлеше билмейдиле неда джарты-къурту джармалайдыла.
– Эм алгъа Хубийланы Исламгъа сау бол дерге излейме, – деб башлады сёзюн Джазыучуланы союзуну ногъай секциясыны тамадасы Казаков Валерий Сеперович. – Ишни таб къурай билген адамды. Аны башчылыгъы бла эки джылны ичинде алгъа иги силкиннгенбиз. Энтда да аны бла сюйюб ишлерик эдик. Экинчи айтырым. Алимле бегитгеннге кёре, отуз джылдан, сёз ючюн, бизни тилибиз къурургъа боллукъду. Ол адам саны аз миллетни къайсы бирини да юсюн басхан булутду. Бизни джолубуз, мен ангылагъандан, тилибизни сакълар ючюн, школлада сабийле бла таймаздан тюбешиб, юрениу-ангылатыу ишни бардырыуду. Ёсюб келген тёлюлени бери бурмасакъ, ала ана тиллерин билирге алланмасала, табсыз болумгъа тюшерикбиз.
Былайда бир затны айырыб чертерге тыйыншлыды. Хубийланы Ислам КъЧР-де миллет ишлени, кёбчюлюк коммуникацияла бла басманы хакъындан министрини биринчи орунбасарыды. Кеси да регионда джамагъат бирлешликлени ишлерине кёз-къулакъды. Аны себебли, законда белгиленнгенине кёре, аны джамагъат организациягъа башчылыкъ этерге эркинлиги джокъду. Алай а регионда Джазыучуланы союзу чачылыб тургъанын эсге алыб, аны джарашдырыб, аякъ юсюне салыр деген иннет бла Хубий улуну эки джылгъа анга башчы этген эдик. Ол анга салыннган борчну, ышанмакълыкъны да сый бла толтургъанына заман кеси шагъатлыкъ этди. Аны ючюн эди хар сёлешген адамны анга сый, бюсюреу этиб баргъаны да.
Джыйылыуну эм баш иши джангы башчыны сайлау эди. Ол джумушну да джазыучула бет джарыкълы тындырдыла. Бютеу миллетлени келечилери, бир тил табыб, дауур-сюйюр болмай, Къарачай-Черкесияны Джазыучуларыны союзуна тамадагъа Байрамкъулланы Илиясны джашы Наурузну сайладыла.
Байрамкъулланы Науруз, джыйылгъанланы алларында сёлешиб, анга ышанмакълыкъ танытханларына разылыгъын билдирди эмда союзну ишин алгъа бардырыр ючюн, бютеу билимин-болумун салыб ишлеригин да айтды.
КъЧР-ни Джазыучуларыны союзуну секретарына Аджибеков Хаджисмель Солтанович сайланды. Миллет секцияланы тамадалары орунларында къалдыла. Къарачай секциягъа Айбазланы Юсюпню джашы Солтан, абаза секциягъа Шебзухова Лариса Курманбиевна, орус секциягъа Браткова Татьяна Николаевна, ногъай секциягъа Казаков Валерий Сеперович, черкес секциягъа Абидокова Люсана Алиевна башчылыкъ этерикдиле.

Мамчуланы Дина.

 
{jcomments}