Республиканы окъуу-билим берген учреждениелерини окъуучулары, аскер къаугъагъа къошулуб, Ата джуртубузну сакълагъан аскерчилеге таймаздан къолларындан келген болушлукъну этгенлей турадыла.

Хорламны келтирир ючюн, регионну джаш тёлюсю гуманитар джюкню джыяргъа болушады, ала кеслери къоллары ала джараулу затланы этедиле, аскерчилени кёллерин кёлтюрюрча письмола джазадыла.
Айтыргъа, Джёгетей Аягъы шахарда 1-чи номерли лицейни сохталары директорну кенгешчилери Къаракетланы Лаура эмда Арина Нагорная бла кеслери къоллары бла «сухой армейский душ» деб аскерчилеге джарарыкъ затла джарашдыргъандыла.
Тюзде тургъан аскерчилеге аны магъанасы уллуду. Ол наборгъа бир кесек суу къошсанг, адам юсюн-башын толусу бла тазалаб чыгъады.
– Сабийле кеслери къоллары бла ишлеген «сухой душ» аскерчилеге кюч-къарыу берир, деб бек ышанабыз. Хар керекге (набор) джюрек джылыуубузну къошханбыз, ол затны аскерчиле сезерик болурла. Мындан ары да быллай керекле этгенлей, бизни къоруулагъан аскерчилеге ашыргъанлай турлукъбуз, – дегендиле бу джумуш бла кюрешгенле.
Аны юсюне да бу лицейде «Кесибизникилени атмайбыз» деген акция да къурамлы ётгенди. Окъуучула, устазлары да болушуб, окопаланы джарытырча джау чыракъла хазырлагъандыла.
– «Сухой душ» да, джау чыракъла да бюгюнлюкде Ата джуртларын къоруулагъан джердешлерибизге бек джарарыкъдыла. Аскерчилени санлары, джанлары да джылынныкъдыла, – деб чертгенди Къаракетланы Лаура.

 
{jcomments}