«Табигъат тазалыкъ» («Экологическое благополучие») деген джангы миллет проектни «Чегетлени сакълау» федерал проектини тамалында Къарачай-Черкесияда 2027-чи джылгъа дери чегетлени сакълау эмда ёсдюрюу бла байламлы кёб иш этер мурат барды. Айтыргъа, 372 гектар джерде чегет орнатыллыкъды.
2025-чи джыл 124 гектар джерде чегет терекле салынныкъдыла. Аны ичине кёб тюрлю иш киреди: джаш терекчиклени орнатыу, джерни джумушатыу, чегетлени ариулау, алагъа ёсерча, кенгерирча мадар этиу.
2026-чы эмда 2027-чи джыллада да 124-шер гектар джерде терекле орнатыллыкъдыла эмда анга кёре башха ишле да баджарыллыкъдыла. Проектде белгиленнгенине кёре, чегетледе кесилген эмда къарт болуб аугъан, къуу болгъан тереклени орунларына артыгъы бла джаш терекчикле орнатыллыкъдыла. Ол зат чегетлени санын сакъларгъа мадар берликди.
«Чегетлени сакълау» деген федерал проект джашаугъа сингдирилиб тебрегенли, ол а 2019-чу джыл башланнганды, Къарачай-Черкесияда 500 гектардан аслам джерде терекле орнатылгъандыла эмда чегетлени кенгертир мадарла этилгендиле.