Шыдакъланы Казимни джашы Расул, кеси разылыгъы бла Ата джуртуну къоркъуусузлугъун сакълай, Украинада бардырылгъан аскер къаугъагъа къошулуб, ётгюрлюк, джигитлик танытыб, къазауат эте, къаты урушланы биринде джан бергенди.
Халкъны тюз иннетли уланы Ётгюрлюкню ордени бла саугъаланнганды, ауушханындан сора.
Расул 1987-чи джыл алтотур (март) айны 26-да Къарачай шахарда Шыдакъланы Казимни халкъны ашхы адетлерин багъалатыб джашагъан юйдегисинде туугъанды. Къарачай шахарны «Вики» деген сабий садына барыб, анда 4-чю классны да тауусхандан сора, 6-чы номерли орта школгъа кёчюб, орта билим алыб чыкъгъанды. Ол 2004-чю джыл Къарачай-Черкес кърал университетге кириб, 2009-чу джыл аны Социал-маданият сервис эмда туризм факультетин джетишимли бошагъанды. Ол, студент нёгерлерине болуша, устазланы айтханларын эте, тюрлю-тюрлю джамагъат ишлеге къошулуб, кёбледен бюсюреу табханды. Расул 2010-чу джылдан МЧС-ни Къарачай районда бёлюмюнде ишлеб тебрегенди. Андан сора Эркин-Юртда кырпыч заводну баш директору къуллукъну толтургъанды. Шыдакъ улу, анга салыннган джууаблы борчну сый бла толтуруб, заводну ишине тири джюрюш береди. Онгсузгъа, къарыусузгъа да болуша, адамлагъа къолундан келгенича джарагъанды. Анда ишлеген кёзюуюнде Дружба элни межгитини къурулушуна да энчи юлюш къошханды. Аны этген сууаблы ишин эсге ала, республиканы Муслиманларыны дин управлениеси Бюсюреу къагъыт бла белгилейди. Таулу джаш, 2019-чу джыл аскерге барыб, Владивостокда МВД-ны органларында къуллукъ этеди. Анга лейтенант чын бередиле.
Аскерде кесини джууаблы ишине терен эс бёлюб, джамагъатны, къралны къоркъуусузлугъун сакълай, бардыргъан тири ишлери ючюн, кърал берген талай Хурмет, Бюсюреу къагъыты барды.
Аскерде къуллукъ этген заманда аны командири полицияны полковниги С.Н.Киричевский анга берген характеристикада былай джазылады:
«Полицияны лейтенанты Шыдакъланы Казимни джашы Расул Владивостокну полициясында оперуполномоченный къуллукъну толтурады. Ол кесин огъурлу, билимли, къаты излемли, кючлю, джигит къуллукъчуча танытханды. Терслеу ишлени тинтиуню хакъындан керекли буйрукъланы, джорукъланы иги биледи. Билимин ишинде иги хайырландырады, закон бузулмазча мадарла къурагъанлай турады. Ол не къыйын болумда да таб оноу эте биледи. Башламчылыгъы, алгъа учунууу, чыгъармачылыгъы кючлюдю. Къуллукъ этген заманыны ичинде ол къошулуб, уголов джаны бла 24 аманлыкъ иш ачыкъланнганды. Владивостокну джеринде джамагъатны къоркъуусузлугъун сакълай, кёб иш бардырады.
Аны халиси ариуду, кесин тута биледи, коллективде сыйы, махтауу уллуду. Адамланы джарлылыкъларына терен эс ийиб къарайды. Спортда да джетишимлиди».
Расул Украинада бардырылгъан аскер къаугъагъа кеси разылыгъы бла 2024-чю джыл къыркъаууз (сентябрь) айны 13-де Москваны Кунцевский районуну военкоматындан кетгенди. Аны къарт аталары Чотчаланы Абдул бла Шыдакъланы Магомед да, Уллу Ата джурт къазауатда болуб, гитлерчи фашистле бла эркишилик, джигитлик танытыб сермешгендиле. Аны ата-бабадан келген къаны, патриотлукъ халиси Джуртну сакъларгъа алландыргъандыла. Расулну СВО-да «Опер» деб чакъырыучан эдиле. Ол, къазауатда да таб оюм эте, аскер борчну сый бла толтура, атын таулу джигитча айтдыргъанды. Джукъдан къоркъмай, артха турмай, эркишилик, джигерлик танытыб, кърал анга салгъан борчну толтура, Донецк Халкъ Республиканы Терны элин азатлай, къузауат эте тургъанлай, душман окъ тийиб, джан бергенди. Тенглери, командирле айтхандан, ол взводну командири болуб, аскер борчун тыйыншлысыча толтургъанды. Чабыуулну аллында болуб къазауат этгенди. Аскерчилени ёлюмден сакълай, аланы кёб затха юретгенди. Кърал аны кёргюзген джигитлигине багъа бере, Расулну Ётгюрлюкню ордени бла саугъалагъанды. Расулгъа ол заманда 37 джыл болгъанды. Аны эки сабийи бла юй бийчеси, атасы бла анасы, эгечи бардыла. Ала джюреклери джылай, бушуу этселе да, Ата джуртну сакълай джан берген эт адамларына разыдыла. Биз барыбыз да аны бла махтанабыз, ёхтемленебиз. Уллу Аллахны рахматында болсун.
Кёб болмай Къарачай шахарны ол окъугъан 6-чы номерли школунда джигитлени белгилей, Расулну юлгюсюнде керти патриотла ёсдюрюр мурат бла, «Парта Героя» деген Бютеуэресей акцияны тамалында анга аталгъан парта ачылды. Джигитни партасын ачыугъа аталгъан джыйылыуну ол школну устазы Джуккаланы Залина къурагъан эди. Белгиленнген классха парталаны салыб, айырмагъа окъугъан сабийлени олтурта эдиле да, бу джол Расулну юйдегисин, атасын, анасын олтуртдула. Алайгъа джыйылгъанла, устазла, сохтала, атала, анала, джууукъла Шыдакъ улуну юсюнден, аны этген джигитлигинден хапар айтдыла.
Тёлюле Расулча джигитлени унутурукъ тюлдюле, адамла аны эсгергенлей турлукъдула.
Лепшокъланы Хусеин.