Лепшокъланы Абул-Керимни джашы Ахмат, халкъы, Джурту ючюн къанын-джанын аямай, кёб тюрлю джерледе фашистле бла эркишилик, джигитлик танытыб, къазауат этгенди. Ачы урушлада джаннган отланы джырыб, душманны техникасын, адам кючюн къаушатыб къайтханды.
Уллу Ата джурт къазауатны, урунууну ветераны эди.
Ахмат 1917-чи джыл Къарачайны эски эллерини бири Къарт-Джуртда Абул-Керимни джигитликни, джигерликни джашау тамал этиб джашагъан юйдегисинде туугъанды. Лепшокъланы юйдегилери 1924-чю джыл Зеленчук районда Морх элге кёчедиле. Ахмат былайда 7-джыллыкъ школну иги окъуб бошайды. Ол, тенгчиклерине болуша, устазланы айтханларын эте, ариу халисин кёргюзе, бюсюреу табады. Атасы малчылыкъ бла, джерчилик бла кюрешгенди. Кърал берген планын артыгъы бла толтура, кёб тюрлю Хурмет, Бюсюреу къагъыт, башха саугъа алгъанды. Джашы да, атасына ушаб, анга болуша, гитчеликден къыйын ишни, джумушну этерге, джигерликге, джигитликге юренеди. Ахмат 1937-чи джыл Зеленокумск шахаргъа механик усталыкъгъа окъургъа барады. Алайда эки джылны иги окъуб, къайтыб келиб, Къарданик станседе МТС-де механик болуб ишге джарашады. Былайда тюрлю-тюрлю тракторланы кереклилерине къарай, мотору, башха джери бузулгъанны ишлей, станцияны ишине тири джюрюш бериб, анга салыннган борчну тыйыншлысыча толтурады. Алай эте фахмулу, таукел адам, ол ишге джангы мадарланы, амалланы киргизе, аны дараджасын ёсдюреди. Ол, аны тышында Къызыл Октябрь элде джаш тёлюню тракторну хайырландырыргъа юретеди. Ахмат атын махтау бла айтдырыб ишлей тургъанлай, заманы джетиб, 1941-чи джыл джаз ала Къызыл Аскерге къуллукъ этерге кетеди. Ол джыл никкол (июнь) айны 22-де Уллу Ата джурт къазауат башланнганында Лепшокъ улу Ровень областда Къыбыла-Кюнбатхан фронтда 5-чи армияны 554-чю энчи сапёр батальонунда болады. Ол, къоркъмай-юркмей, кёб джерни миналадан, башха атылгъан устройстволадан ариулайды.
Джигит Ахмат Киевни, Харьковну, Сталинградны сакълагъанланы тизиминде болуб, кёб урушлада эркишилик танытханды. Ол Сталинградда 284-чю атыучу дивизияны 1047-чи атыучу полкунда стрелок-снайпер болуб да къазауат этгенди. Кёб немец солдат бла абычарны къырыб, командирледен Бюсюреу къагъытла, башха саугъала алгъанды. Ахмат, Къызыл Аскерни къурамында уруш этиб, Дон, Днепр, Днестр, Прут, Дунай сууланы ётгенди. Одессаны, Румынияны, Болгарияны, Югославияны, Венгрияны азатлаугъа къошулгъанды. Кёб урушлада джигитлик танытыб, атын иги бла айтдыргъанды, талай медаль бла саугъаланнганды.
Ол къазауатны ахыр джылында 3-чю Украин фронтну 7-чи механика корпусуну 97-чи энчи чекчи батальонуну къурамында къазауат этгенди. Лепшокъ улуну Уллу Ата джурт къазауатны ачы джоллары къалайгъа элтселе да, джигитлиги аны юсюнде кёрюннгенлей тургъанды. Хаман да атхан огъу джерге тюшмей, марагъан джерине тийгенди.
Ахмат Уллу Ата джурт къазауатны 2-чи къауумуну сакъаты болуб, башына бош этилгенди. Ол 1945-чи джыл башил (январь) айны 17-де Будапешт шахаргъа, немчаланы къыстай, чабыуул этген сагъатда, тоб атылыб, джер тебрениб, таш эриген заманда, окъ тийиб, ауур джаралы болады. Госпиталда саулугъун бакъдырыб аякъ юсюне тургъандан сора, кёкюрегинде медаллары джылтырай, Орта Азиягъа барыб, юйдегисин табады. Анда къолундан келгенича тюрлю-тюрлю ишледе урунады. Тюзлюк орун алыб, кёчюрюлген халкълагъа джуртларына къайтыргъа эркинлик берилгенинде, Лепшокълары халкъ бла бирге Къарачайгъа къайтадыла. Мында да ол тюрлю-тюрлю ишледе махтаулу ишлеб тургъанды.
Лепшокъ улу, Къарачай районну аскер ветеранларыны советини члени болуб, джаш тёлюню ариу халиге, патриотлукъгъа, Джуртха кертиликге юрете, къолундан келгенни этиб кюрешгенди.
Ахмат Батдыланы Гыкканы къызы Кулистаннга юйленеди. Алагъа 5 джаш бла 2 къыз – Борис, Халис, Салых, Салим, Расул, Земфира, Зульфа – тууады.
Халис, Ставрополдагъы педагогика институтну тарих факультетин тауусуб, тарихден, обшествоведениеден, ингилиз тилден усталыкъла алыб чыгъады. Ол Къарачай районда Огъары Тебердиде, Къумушда, Правокубанскийде ишлеб тургъанды. Андан сора Черкесскеде 17-чи номерли гимназияда 25 джыл ишлегенди, устаз, директорну орунбасары болуб халкъгъа хайыр келтирген кёб иш этгенди. Бусагъатда 5-чи номерли гимназияда усталыгъыны юсю бла ишлейди. Сабийлеге билим бере, аланы ариу халиге юрете, алгъа тири барады.
Салим, Москвадагъы полиграфия институтну джетишимли тауусуб, Черкесскеде типографияда ишлеб тургъанды. Бусагъатда тыйыншлы солуудады.
Лепшокъланы Ахматны къазауатны, урунууну ветераныны кърал берген саугъаларыны арасында орденлери талай медалы барды.
Ахмат 1999-чу джыл эндреуюк (декабрь) айда Къумушда ауушханды, Аллахны рахматын табсын.
Халкъ кесини джигитлерин унутмайды, адамла аны эсгергенлей турлукъдула.
Алчакъланы Хусей.
