Халкъыбызда хар не тюрлю санагъатда да атларын махтау бла айтдыргъан адамла кёбдюле. Бирле сабий заманларындан, экинчиле бара-бара, халкъгъа хайыр келтирген джетишимлени къатлайдыла. Лепшокъланы Хасанны джашы Мурат, джаш болса да, аллай белгилилени бириди.
Мурат 2010-чу джыл арттотур (апрель) айны 8-де Ючкекенде Хасанны халкъны ашхы адетлерин тутуб джашагъан юйдегисинде туугъанды. Школгъа 6 джылында баргъанды. Ол Римгорка элни Ш.Х. Джатдо улуну атын джюрютген 8-чи номерли школунда окъуйду, дерслерин иги биледи. Джашчыкъ биринчи классдан огъуна физкультура бла, спорт бла кюрешиб башлагъанды. Спортну каратэ тюрлюсюн сайлаб, къыйын болса да, чыныгъа, тёзе, кюч ала, тюз оюм этерге юрене, кече-кюн демей кюрешеди. Аны биринчи юретиучюсю Ючкекенде Гасанов Зульфикарды. Ол аны 6 джылындан юретиб башлагъанды. Зульфикар Лепшокъ улуну спортну бу тюрлюсюнден тюрлю-тюрлю дараджада бардырылгъан эришиулеге элтиб тургъанды. Юретиучюсю кёллендире, тюрлю-тюрлю амалланы къалай хайырландырыргъа боллугъун айта, аны фахмусун ача, билимин ёсдюре, кючюн кёбейте, къолундан келгенни аямайды. Мурат Тырныауузда, Сочиде, башха джерледе бардырылгъан эришиулеге къошулады. Сынамын ёсдюре, алдан алгъа бара, кёб эришиуледе ёчлю орунланы алады. Ол Гитче Къарачай районда хорлаб, андан сора каратэден 14-15 джылгъыланы арасында 52 килограмм ауурлукъда республикан дараджада бардырылгъан эришиуледе Къарачай-Черкес Республиканы биринчилигин талай кере иелегенди.
Онбир джылындан бери ол КъЧР-ни джыйым командасыны юретиучюсю Тебуланы Хамитге джюрюб, андан юренеди. Аны бла Шимал Кавказ федерал округну биринчилигинде экинчи, Краснодарда «Кубок Ники» эришиуледе биринчи орунланы алады, КъЧР-де да талай кере биринчи болады.
Мурат озгъан джылны аягъында каратэден «Кубок ТЭС 2024» деген Симферополь шахарда бардырылгъан Бютеуэресей эришиулеге къошулады. Ары Эресей Федерацияны 28 регионундан 1000 спортчу баргъанды. Анда кесини ауурлугъунда хорлаб, 14-15 джыл болгъан спортчуланы араларында Эресейни чемпиону болгъанды. Алай бла, ол Спортну устасына кандидат болгъанды.
Биз, Муратны бу ашхы хорламлары бла алгъышлай, анга джангы мийик джетишимле теджейбиз.
Алчакъланы Хусей.