Мындан алда Черкесск шахарны «Джашил айырымкан» атлы солуу паркында «Юбилейный» спорт къалада самбодан IX-чу Бютеуэресей турнир ётгенди.
Ол КъЧР-ни Халкъ Джыйылыууну (Парламентини) депутаты, дунияны чемпиону Кунижев Мухамед Асланбековични сыйына аталгъан эди.
Эришиулеге 14 – 16 джыллары толгъан 180 джаш тутушуучу къошулгъанды. Турнирге къошулгъанла ауурлукъларына кёре тогъуз тюрлю къауумгъа бёлюнюб, спортну бу тюрлюсюнде эришгендиле.
КъЧР-ни Башчысыны эмда Правительствосуну Администрациясыны тамадасы Озов Мурат дунияны чемпионун – Кунижев Мухамедни – эртдеден таныгъаны себебли, аны сыйына аталгъан спорт джыйылыугъа келген эди. Дагъыда сыйлы къонакъланы арасында аты дунияны башына белгили тренер Вячеслав Пчелкин, Кунижев Мухамедни эгечлери, самбодан Европаны эмда дунияны чемпиону Гукев Рамед да бар эдиле. Джыйылыуну хошкелди сёз бла ача, Озов Мурат былай айтды:
– Къарачай-Черкесияда джашагъан миллетледе тутуш ёмюрлени узагъындан бери адет болуб сакъланыб келгени себебли, бюгюнлюкде бизни спортчу уланларыбыз ол сыйлы адетни тохтатмай бардырлыкъларына ишексизбиз. Бу турнирге Эресейни кёб регионундан спортчула келгендиле. Аны себебли, барына да айтырым: сиз тамблагъы кюнюбюзню ышаннгылы тёлюсю болгъаныгъызны черте, самбо спортну мийик дараджагъа чыгъарыб, къралыбызны атын да дуния башына айтдырлыкъсыз деб ышанабыз. Кунижев Мухамедни спортда этген джетишимлери, джашау джолу ёсюб келген джаш спортчулагъа бек ашхы юлгюдю. Аны себебли, бюгюнлюкде джаш адамлагъа патриотлукъгъа юренирге, шохлукъну къаты тутаргъа эмда спорт бла къаджыкъмай кюрешиб, уллу джетишимле этерге ачыкъ юлгюдю ол. Спортчуларыбызгъа мийик дараджалагъа чыгъарлай хорламла эмда саулукъ-эсенлик теджейме.
Эришиулени ахырында эсеблерин чыгъардыла, хорлагъанланы атларын да белгиледиле. Къарачай-Черкесияны спортчулары бу джол да хорламлы болуб, 8 медаль бла саугъаландыла. Джутов Амиран, Гонов Шамиль, Батрукъланы Айдар алтын медаллагъа иеле болдула. Экинчи оруннга да Кармов Марат бла Чиков Амаль чыкъдыла. Ючюнчю оруннга да Лахов Аслан, Чотчаланы Азамат эмда Кнухов Эмир тыйыншлы болдула.
Былайда спортчу джашланы эришиулеге хазырлагъан усталаны атларын да айтыргъа тыйыншлыды: Байчораланы Пилял, Бостанланы Аслан, Тотоев Ричард, Абитов Марат, Охтов Азамат.
Чертерге тыйыншлыды – дунияны чемпиону Кунижев Мухамедни сыйына аталыб, быллай эришиуле бизни регионда 9-чу кере бардырыладыла. Быйыл, бу турнир Эресейни 20 регионундан сора да, Узбекистандан, Абхазиядан дегенча узакъ джуртладан спортчуланы да бирикдиргенди. Гёджеблерибизни хорламлары бла алгъышлай, биз да алагъа саулукъ, джетишимле теджейбиз.
(БИЗНИ КОРР.).