Къарачай-Черкесияны Джамагъат палатасында Аскер къаугъаны ветеранларыны бирлешлигини бизни регионда джангы къуралгъан бёлюмю биринчи кенгешин бардырды.
СВО-ну ветеранларыны бирлешлигини бизни республикада регионал бёлюмю Къарачай-Черкесияны Башчысы Темрезланы Рашидни башламчылыгъы бла къурала турады. Аны биринчи кенгешине къошулгъанлагъа хошкелди айта, Къарачай-Черкесияны Джамагъат палатасыны тамадасы Елена Ляшова, Ата джуртубузну джакъчыларына уллу сый бериб сёлешди.
«Сизни ётгюрлюгюгюз, джигитлигигиз, къыйын болумда тёзюмлюлюгюгюз къралыбызны ёсюб келген тёлюсюне ашхы юлгюдю. СВО-ну ветеранларыны бирлешлиги къуралгъаны къралыбызны джаудан къоруулагъанлагъа, бизни рахатлыгъыбызны сакълагъанлагъа бир джерде кёлтюргючлюк этерге себеб боллукъду», – деди Елена Ляшова.
Аскер къаугъаны ветеранларыны бирлешлиги магъаналы, ауур ишни баджарлыгъын Къарачай-Черкесияны Башчысыны эмда Правительствосуну Администрациясыны тамадасыны биринчи орунбасары Хубийланы Марат да чертди.
«Бизни арабызда, Ата джуртха сюймекликлерин кёргюзе, кеслерини саулукъларын атыб, командирлери салгъан аскер борчланы махтаулу толтуруб келген адамла кёбдюле. Аланы антларына кертиликлери, бир-бирлерине билек бола билгенлери бла къралыбызны джери кенгере баргъанын кёребиз.
Бюгюн биз Аскер къаугъаны ветеранларыны бирлешлигини ишин башлайбыз. Нюзюрюбюз, баш борчларыбыз да белгилидиле. Бирикгенибиз неден да баш болгъанын эсге алыб, аскерчи джердешлерибизге не тюрлю болушлукъну да бирге этерге керекбиз», – деди Хубий улу.
Къарачай-Черкесияны Башчысыны кенгешчиси Ёзденланы Алибек да Аскер къаугъаны ветеранларыны бирлешлигини регионал бёлюмю СВО-дан къайтхан джердешлерибизни рахат джашауда тыйыншлы орунлу этер мурат бла къуралгъанын чертди.
Аскер къаугъаны ветеранларыны бирлешлигини регионал бёлюмюне тамадагъа салыннган Мутчаланы Дахир да: «Ветеранланы хар бирине да джарар ючюн, къуллукъ борчубузну магъанасы уллу болгъанын толу ангылаб мийик дараджада ишлерге керекбиз. Бизни къоркъуусузлугъубузну бегитир ючюн, кеслерин аямагъан джигитлерибизни джашауларын иги этер мурат бла барыбыз да бирге кюреширге керекбиз», – деди. Мутча улу кеси СВО-да болгъанды, къанлы урушланы, хапарда болмай, кеси сынагъанды да ветеранланы джарсыуларындан, къайгъырыуларындан толу хапарлыды. Ол ветеранлагъа хакъ джюреги бла болушургъа тырмашырыгъына ишек джокъду.
Алайды да, кенгешде айтылгъаннга кёре, Аскер къаугъаны ветеранларыны бирлешлигини регионал бёлюмюнде Мутчаланы Дахирни башчылыгъы бла ишлеген къауум, СВО-ну ветеранларына болушур, аланы эркинликлерин сакълар, ол джигитлерибизни юлгюлеринде джаш адамларыбызны патриот ангыларын бегитир, бирлешликни къурамына киргенлени бирикдирир мадарла къурарыкъдыла.
Этилген ишни себебинден, СВО-дан Хорлам бла къайтхан джердешлерибиз рахат джашауда кеслерине тыйыншлы орун табарларына ышанмакълыкъ уллуду.
СОЛТАНЛАНЫ Зульфия.
