«Демография» миллет проектни орнуна быйыл «Юйдеги» проект ишлеб башлагъанды. Джергили Ана капиталны юйдегилеге табдырыу да ол проектни юсю бла боллукъду.

КъЧР-ни Башчысы Темрезланы Рашидни бегимине кёре юйдеги не иги джашаса да, анга тёртюнчю эмда андан сора сабий тууса, джергили Ана капитал берилликди. Аны ёлчеми 2025-чи джыл 150 минг сомду.
Озгъан джыл регионда 555 юйдеги джергили Ана капиталны алгъанды. Аны тышында да аталары аскер къаугъагъа къошулгъанланы хар туугъан сабийлерине бир ызгъа 150 минг сом Ана капитал бериледи. Ол Эресейни Президенти Владимир Путинни бегими бла байламлыды. 2024-чю джыл ол ачханы бизни республикада 74 адам алгъанды. Джергили Ана капиталны алыргъа эркинлиги болгъан адам тилек къагъытын Кёб функциялы аралыкъгъа, Джамагъатны социал джаны бла къоруулагъан управлениеге неда Кърал джумушланы порталына табдырыргъа тыйыншлыды.
2024-чю джыл законда этилген тюрлениулеге кёре, КъЧР-де джергили Ана капитал тёртюнчю неда андан сора туугъан сабийлеге теджеледи – сабийге ненча джыл болгъанына да къаралмайды.
Айтыргъа, 2025-чи джыл 2022-чи – 2023-чю джыл туугъан сабийлеге, 2026-чы джыл 2024-чю – 2025-чи джыл туугъан сабийлеге, 2027-чи джыл 2026-чи – 2027-чи джыл туугъан сабийлеге берилликди джергили Ана капитал.
Бир затны эсге алыргъа керекди: джергили Ана капиталны алыр ючюн, тилек къагъытны сабийге юч джыл толгъунчу джазаргъа тыйыншлыды.