Арт джыллада бир сабийни ёсдюрген да тынч тюлдю. Иш – джокъ, иши болгъанланы уа хакълары – аз. Ол себебден болур, джаш адамларыбызны юйюр къураргъа ашыкъмагъанлары да.

Алай а сабийле ёсдюрюу джумушдан къоркъмагъанла, хар туугъан баласын уллу насыбха тергегенле да халкъыбызда бардыла. Ала былай оюм этедиле: «Саулугъум аман тюл, къолум, аягъым бар, эринчеклик этмесем, къалай асыраялмам сабийлерими. Аналары да бош туруб турмаз…»
Алисолтан джашланы ол къауумунданды, аны сакъалына акъ кириб да башламагъанды, беш сабийи уа арбазда ойнайдыла. Уллусу Умар быйыл тогъузунчу классха барлыкъды. Сабийни кеси ёсе баргъаныча, кереклиси да кёб бола барады. Кърал а онджети джылдан сора сабийге берилген болушлукъну тыйыб къояды.
Алисолтан арый-тала билмей ишлейди. Машиналагъа къараб, бузулгъанларын ишлеб, кече уа къараууллукъ этиб, хар алгъан сомчугъун юйюне келтиреди. Ыйыкъны ахырында нёгерлери: «Кел бирге олтурайыкъ, солугъан да бир эт. Не кёб ишлесенг да, бусагъатда сабийле «меннге-меннге» деб турлукъдула ансы, ма кёрюрсе, спас этселе, аурусанг, джарсысанг», – деселе да, унамагъанды. Къызгъанчдан тюл, ачханы зырафына къоратыргъа сюймегенден. Ишчи нёгерлери да ол болумну ангылаб, кёллери къалмагъанды. Алай а Алисолтанны юсю-башы да аладача болмагъанын эслемей турмай эдиле.
…Джаш адамланы бусагъатда эслери-акъыллары да тюрлю-тюрлю гаджетлеге бурулубду. Ууакъ сабийлени огъуна къолларында – телефонла, алада уа – кёб тюрлю оюнла. Керек затла да бар, алай а школчуланы асламысыны заманлары оюнлагъа кетеди. Умар окъугъан классда уа джашлада, къызлада да – арт заманда чыгъа келген багъалы телефонла. Джангыз анда – эски (кнопкалы) телефон. Классны джашы-къызы да бир-бирлерине телефонларын кёргюзюб махтанадыла. Умарны уа махтаныр заты джокъ.
Лаура уа, Умар эртдеден бюсюреген къыз, бир джол джашха былай айтды (ариула, эркин ёсгенле адамны джанына тиер айтханыбыз, деб ангыламайдыла): «Умар, сизни юйге да ачха къытлыкъмы киргенди, сени телефонунг къаллайды? Аллайны бусагъатда къартла да джюрютмейдиле», – деди.
Аны сёзлери Умарны джюрегин бек къыйнадыла. Бютюн да, къызны айтханын эшитиб, тенглерини кюлгенлери. Ол кюн атасындан джангы, «крутой» телефоннга ачха тиледи джаш. Атасы ишде къалай къыйналгъанын, уллу юйюрню асырагъан тынч болмагъанын да ол биле эди. Алай а тенглериндеча телефону болурун, Лаураны да аман тилин тыяргъа бек сюйдю.
Атасы огъай демеди. «Хо, тамбла ишими юсю бла ачхачыкъ тюшерикди, сен школдан сора мени ишлеген джериме келирсе да, ачха берирме, болджалгъа салмай, телефонла сатыучу салоннга барыб сайларса», – деди.
Умар, асыры къууаннгандан, кече хазна джукъламай чыкъды. Школдан сора уа мычымай атасыны ишлеген джерине джетди. Ол а джюк ташыучу машинаны тюбюне джатыб, несин эсе да ишлей тура эди. Джашын кёрюб, ачха курткасыны ич хурджунунда болгъанын айтды да, ачха Умарны къолуна тюшдю.
Къууанчыны чеги джокъ – джаш адамла не гитче затчыкъгъа да къууана биледиле, уллайгъанлада да алай болса эди… Энди тамбла кёрюрле аны джангы, омакъ телефонун, интернети да, тюрлю-тюрлю функциялары да болгъанын…
Алай а джашны кёзюне ишлей тургъан атасыны аягъында чурукълары илиндиле. Ала уа – эскиле. Бирини олтаны айырылыб, темир чыбыкъ бла тигилгеннге ушашлы, джер-джеринден байланыб. Джылтыргъан чындайындан а баш бармагъы къараб, къоллары уа билеклерине дери джау джугъу болуб.
«Умар, бар, кеч этме. Мен юйге бюгюн барлыкъ болмам, хар затха сен иги къара. Къараууллукъ ишимде бюгюн мени кёзюуюмдю», – деди.
Умар, бир зат акъылына келиб, таукел тюкенле таба атланды. Ма телефонла сатхан салон, кир да, сайла. Алай а джаш салоннга бурулмай, къарагъан огъуна этмей, озду. Арлакъда кийимле сатылгъан тюкеннге кирди да, атасына чурукъла алды, андан къалгъан ачхагъа уа – ариу кёлек бла костюм.
Умарны джангы телефон алыргъа излегенинден бир джукъ да къалмады. Аны къой, джюрегине бир хошлукъ келиб, кеси кесине разы болду. Телефонсуз да къалмады, джашы бла асыры ёхтемленнгенден кёлю кёкге джетген ата, мадар табды анга. Алисолтан, 16-джыллыкъ джашы сабийликден чыгъыб, киши мардасына киргенин ангылаб, къууанды. Эртде заманда иги джашха улан деб бош айтхан болмазла.

Темуккуланы Адил.
Огъары Малкъар эл.

 
{jcomments}