Хубийланы Локъманны джашы Ханапий Уллу Ата джурт къазауатны ал джылында туууб, кёчгюнчюлюкде ёсюб, халкъы бла бирге джашауну ныхытлы джолларында атлагъан тёлюденди.

Сыналыб, чыныгъыб, халкъыны керти, ышаннгылы уланы болалгъан, джашауда тыйыншлы орун табалгъан къауумданды. Анычалагъа тюбесенг, ушакъ этиб, иннет тазалыкъны, адамлыкъны, халаллыкъны кёзлеуюнден уртлагъанча боласа, кюнде-кюнню юсюнге тюшген букъудан, керексиз, кёбелек сагъышладан, къайгъыладан тазаланнганча, джашаугъа джарыкъ кёзден къараб башлайса. Тёгерекде аманлыкъны, хатерсизликни, аяусузлукъну, адебсизликни орунлу болуб баргъанларын кёрюб, кёлюнг аз бола, джашауну тюзеллигинден тюнгюле башласанг, джюрегингде ийнанмакълыкъ, джарыкъ сагъышла, огъурлу имтиниу бла джашагъан аллай адам сеннге дарман болуб къалады. Кёлсюзлюгюнг, тюнгюлмеклигинг ючюн ичингден уяла, кеси кесинге айыб этесе, кёз къарамынг, сагъышынг да джангырыб, адамлагъа, халкъынга, Джуртунга сюймекликден толаса. Бир тыйгъычха тирелгенлей, табсыз болумну сынагъанлай, бютеу дунияны терслеб тебреу сынгар къарыусуз, мискин адамланы къылыкълары болгъанын ангылайса. Къарыусуз халили адам, джашауда гитче къара тамгъаланы кёрсе, уллу кюнню унутуучанды, джашаугъа да, кеси халкъына да аман айтыргъа истемейди. Аллайны кесинден да, ушагъындан да, бир джукъгъан ауруудан кибик, башынгы сакъларгъа керексе.
Игиликге ийнанмагъан игилик эте да биллик тюлдю, мени сартын. Керти халаллыкъ, башханы игилигине бюсюрей билиу, кеси кесине базынмакълыкъ, ётлюлюк дегенча затла толу адамны шартларыдыла. Аллайла, кеслери да иш этиб кюрешмегенлей, эслерине да келмегенлей, адамлагъа ашхылыкъны дерслерин бере джашайдыла.
Муну барысын Ханапий ючюн айта турама. Кука, джизги сёзлени сюймейме – билеме, адамлагъа къуу махтауну бериу кишини сыйына сый къошмайды. Ёзге хар сёзюм хакъды, тамаллыды да, аны ючюн джазама.
Энчи танышлыгъы, шохлугъу ючюн махтайды Ханапийни деген да гюнах аллыкъды. Мен аны юсюнден аны таныгъанла-билгенле, аны бла сау джашауларын къазанлашыб келген адамла, кёб джылланы биргесине ишлегенле айтханны къайтарама. Игилени юслеринден айтыргъа да, джазаргъа да керекди, халкъ аланы билир ючюн. Ханапий да аланы бириди – халкъыбызны таза иннетли, керти патриот уланы, ашхы адамы. Аллай адам болгъаны ючюн кёбдюле аны тенглери. Къуру къарачайлыла тюл, бютеу миллетлени келечилеридиле ала. «Интернационалист» дейбиз аллайлагъа. Кертиси да, адамлыгъы болгъан адам не адам, не миллет айырмайды. Къур’ан, дин айтхан да олду. Башхагъа керек кюн ёрге тура билсенг, джюрек къайгъырыуунгу, таза иннетинги танытсанг, ким да илеширикди, анга кёре да джууаб берликди сеннге. Сыйынгы мийикде тутарыкъды.
Эсимдеди, профессор, илмуланы доктору, академик, адыг дуниясында уллу сыйы болгъан, Къарачай шахарда кёб джылланы джашаб, институтда ишлеб кетген киши, Хапсироков Хызыр, ёлюрюнден бир айны алгъа тау шахаргъа да, анда эски шохларына да тансыкъ болуб, ары талай кере барыб къайтханын айтханы. «Айырыб да Хубийланы Ханапийни – Тобчукъну – бек кёрюрюм келе эди. Юйюне да бардым, табалмадым. Менден джашды, меннге тюбесин, анга тилегими бир билдир», – деген эди меннге. Ханапийге аны тилегин айтханымда, талай джашны да биргесине алыб, Черкесскеге келиб, анга тюбеб разы этген эди ол ашхы адамны. Ол тюбешиулерини кёзюуюнде Хубий улуну адамлыкъ къудуретин ачыкълагъан мен кесим билмеген кёб ашхы иши, атламы белгили болгъан эдиле меннге.
Тегейли Кочиев Павел Матвеевич да аныча, Ханапийни эртделеден таныгъан, Теберди шахарда хоншулукъда джашаб, кёб джылны аны бла шохлукъ джюрюртюб, бирге туздам юлешиб келген огъурлу, келбетли къарт айтхан да эсимдеди.
– Тобчукъну (ол Ханапийни эрке атыды – К.Х.) бир тюрлю джарыгъы, джылыуу барды, адамланы анга илешдирген, мукъладисча, кесине тартхан, – деген эди ол меннге. – Адамны сыйын кёре, аны кёллендире, керек джерде кимге да хатер эте билген тамам асыулу, деменгили адамды. Керти-керти, ётюрюксюз интернационалистди. Аны кючюнден къарачайны шохларыны саны кёбейгенди десем ётюрюкчю болмам. Дунияда эки миллет барды – бири игиледен, экинчиси, аманладан къуралгъан дерге сюеди кеси да.
Ханапийни ол сейир кючюню, фахмусуну юсюнден Республикан ветеринар станцияны алгъыннгы тамадасы Дзыба Мухаммед, республикада белгили атчы Орусланы Къылычгерий, бютеу джашауун ветеринар къуллукъда ашырыб келген Барануков Мухаммед, Къарачай районну эл мюлк управлениесини къуллукъчусу Блимгъотланы Руслан, аны таныгъан тюрлю-тюрлю миллетлени адамлары бирча джылы айтадыла. Миллетлигинден эсе, адамны адамлыгъына къарайды неден да алгъа. Аны бла бир кере тюбеген, аны бла бир иш этген башха миллетли адам бизни халкъгъа иги кёзден къараб башлайды. Ма алай халкъыбызны эм иги, ариу шартларын джюрютеди юсюнде.
Керти интернационалистлик патриотлукъдан чыгъады, бир ишексиз. Ханапийни тышындан келген къонакълагъа къайгъыргъаны да аны кёргюзеди. Халкъыбызны бетин чыгъарыр ючюн, бир затын къызгъанныкъ тюлдю ол. «Хар адам къалайда да кесин халкъыны келечиси кибик джюрютюрге борчлуду, керти адамгъа санай эсе кесин», – деученди. Алай демеклик, халкъынг ючюн, сёз айта билирге, аны сыйын тюшюрмезча джюрютюрге керексе кесинги.
Ханапийни халкъы бла джаны бирди, десем, асыры мийик, кука сёзге санамасын киши да. Тюзю да алайды. «Джамагъат» миллет бирлешлик къуралгъан кюнюнден ахырына дери аны эм тири члени болуб келгени огъуна ачыкълайды алайлыгъын.
Аны «Шохлукъ» орден бла саугъаларгъа теджей, 2000-чи джыл республиканы ветеринар къуллугъу, Къарачай районну администрациясы анга берген характеристикадан иги киши да ачыкълаяллыкъ тюлдю Ханапийни болумун, адамлыкъ къудуретин. Ол сёзлени толусу бла келтирирге излейме.
«Хубийланы Локъманны джашы Ханапий, Къарачай районну баш ветеринар врачы, ветеринар илмуланы кандидаты, шахар бла районну ветеринар къуллугъуна башчы болуб, 1984-чю джылдан бери аны мюлк техника базасын бегитиуге, билимли, этимли ветеринар устала хазырлаугъа, ветеринар-профилактика ишлени хайырлылыкъларын джаяргъа уллу къыйын салгъанды. Аны себебинден районда арт 15 джылны ичинде мал ауруу къымылдамагъанны, эл мюлкге, энчи рысхыгъа да заран тюшмегенни орнундады.
Эл мюлк санагъатха къошхан уллу юлюшю эмда кёб джылны бёлюнмей, джетишимли урунуб келгени ючюн, РФ-ны Президентини Указы бла анга 1993-чю джыл «Эресей Федерацияны махтаулу ветеринар врачы» деген ат аталгъанды. Къарачайлыланы ичинде ол сыйлы атны биринчи алгъан Хубий улуду. Бизни республикада уа аллай ат аталгъан сынгар эки адам барды – экинчиси Байрамкъулланы Махмут.
Кесини кърал къуллугъун ол халда махтаулу баджарыб келгенича, Хубий улу джамагъат-политика ишлеге да тири къошулады. Халкъ депутатланы Къарачай шахар, район Советлерине кёб кере депутатха сайланнганды, районну, республиканы урунуу коллективлерини эмда бютеу джамагъатыны арасында тыйыншлы сый, махтау табханды.
«Джамагъат» республикан миллет бирлешликни советини таймаздан члени, аны председателини орунбасары болуб, организацияны ичинде экстремизмге, сепаратизмге тартханла бла, джанына къоркъуу бола тургъанына да къарамай, къаты кюреш бардыргъанды. Къарачай-Черкесияны РФ-ны къурамында болууун эмда аны бирлигин сакълауну джанлаусуз джакълагъанды, халкъланы араларында ёмюрледен келген таулу шохлукъну бегитиуте не джанындан да себеблик этгенди, алай бла, Къарачай-Черкес Республикада рахатыкъны сакълаугъа тамам уллу къыйынын салгъанды».
Къачан да ма аллай эсли, басымлы, ётлю адамланы кючюнден, тюз оноу этилиб, къарачай халкъ джашау джолунда къыйын болумладан, джарсымай, бетин джоймай, чыгъа келгенди.
СССР оюлургъа «тырмы тарта» тургъан сагъатда, къатышхан болум бла хайырланыб, кеслерини кир иннетлерине джетерге излегенле кёб болгъан эдиле.
Талай республика баямланнганын унутмагъанбыз. Бизни сюймеген бир къауумла, къазакъланы бизге удуб, арабызны бузгъан кёзюуледе, аз къалса, тюйюш-уруш къабыныргъа башлагъан джерлеге Ханапий «Джамагъат» бирлешликни башчылары Орусланы Азрет, Къобанланы Абдул бла бирге баргъанды, дженгиллик этмей, тюшюндюрген сёзю бла къызыб тургъан адамланы джюреклерине сабырлыкъ салгъанды. Алай этер ючюн а, ёт да, оюмлулукъ да, басымлылыкъ да бирча керек эдиле. «Джамагъат» бирлешлик эди ол кёзюуде халкъны таянчагъы, ышанчысы да.
Власть джукъгъа да тергелмей къалгъан эди: тюз оноу этерге, халны джорукъгъа джыяргъа къолундан келмей эди. «Джамагъат», кавказ халкъланы барысына юлгю кёргюзюб, бютеу къралгъа аты айтыла башлагъанында, бизде аны сыйы бла хайырланыргъа излегенле чыкъгъан эдиле. Биреуленле кир иннетлерин толтурургъамы огъесе энчи амбициялары амалтынмы этдиле, бюгюн билген къыйынды, миллет бирлешликни аны нюзюрлерине келишмеген ишлеге къатышдырыргъа излеген эдиле. «Джамагъатда» демократиялыкъ, патриотлукъ джокъду, дегенни айтдыла да, ол «энчи республика болуу» деген фикирни джакъламайды деб, бир къауумла аны къурамындан чыкъдыла, Къарачай автоном республиканы къуралгъанын баямладыла. Советлени юйюню башына кеслерини байракъларын орнатдыла. Алай бла, бирси хоншу миллетлени сескеклендирдиле, аланы харам иннетли къауумларына да аш бердиле бизни юсюбюзден аман сёлеширге, халкъыбызгъа кир къуяргъа.
Ма ол къауумну Хубий улу къаты хыртлаб, айгъакълаб сёлешгени, алагъа къаршчы кюреш бардыргъаны ючюн сепаратист джолгъа тургъан биреуленле Ханапийни къурутургъа оноу этген эдиле. Аны билиб, «Джамагъат» бирлешликни башчылыгъы Ханапийни бир заманнга дери джашырыб да тургъан эди.
– Игиле аманладан, игилик аманлыкъдан кёбдю – алайсыз джашау къурур эди, – деб къайтаргъанлай турады Ханапий. – Бизни халкъны башхалагъа сукъланыр джери да джокъду. Адам саныбыз бла аслам болсакъ, республиканы эм аламат джерлерини иеси да биз болсакъ, урунууда кишиге ал бермесек, джаш тёлюбюз ётгюрлюгю, джигитлиги бла айтылса, не дейбиз да? Бизни онглулугъубуз джюреклерине тынчлыкъ бермеген харамла джетишедиле. Аллайланы ауузларын джабдырабыз деб, дженгиллик этерге джарамаз – оюмлулукъну, чыдамлылыкъны, сабырлыкъны тас этмезге керекбиз. Бизни халкъда ёмюрде да бир адам кесича бир адамгъа бел бюкмегенди. Ол халиси бюгюн да турады юсюнде. Аллай ёхтемликни иги, аман джери да барды. Бирибизни бирибизге тынгыларгъа сюймегени андан чыгъады – ма олду биригирге чырмау болуб тургъан. Бириксек, бизге джетген бир халкъ болмаз. Бусагъатда сынгар бирикмеклик керекди бизге, къалгъан затыбыз джетеди. Джамагъатыбызгъа ол затны хаман айтханлай турайыкъ, кёл берейик, учундурайыкъ...
Ханапийни, ма мунуча дагъыда бир башха оюумуна да «хо» дериксе. Хар адам кесини джеринде орнун тыйыншлысыча толтурургъа керекди, дейди ол. Аллай адамлагъа уллу сый да береди. «Мен этелмеген ишни этгенле сау болсунла, аласыз инджиллик эдик», – деб башхалагъа – артистлеге, журналистлеге, джазыучулагъа, тюз ишчилеге – хурмет эте, алагъа къолундан келгенича да болушургъа кюрешгенди. Кесини орнун къалай толтургъанын айтсакъ а, ишин аныча сюйген, аныча биширген адамны табхан къыйынды.
Элчи кишини джашы къойчу болуб башлагъанды урунуу джолун. Ол эл мюлк институтха окъургъа киргинчи да атасы Локъманны «мал дохтурлукъ университетин» тауусхан эди.
Аны джашы болуб, Ханапийни учхара адам болургъа мадары джокъ эди. Бюгюн атасыны юсюнден уллу разылыкъ бла хапар айтханына бюсюреу эте тынгылайса. Халал урунууну неден да сыйлы кёрген Локъман алгъышда айтырча, бир асыулу, огъурлу адам болгъанды. Джашаууну 109-чу джылында кетгенди керти дуниясына. Ахыр кюнюне дери ишлегенни къоймагъанды.
– Къарт атам Чомайны Темир Тюзде джери, малы да кёб эди, – дейди Ханапий. – Ол заманлада адамла, бусагъатладача урлаб, хыйлалыкъ этиб тюл, халал урунуб бай бола эдиле, ол къауумдан эди аппам.
Колхозла къурала башлагъанларында, орталыкъгъа бютеу малын берген эди. «Темир Тюз» колхоз аны джери бла малыны тамалында къуралгъан эди. Атам да аппамы биргесине ишлеб тургъанды. Аны кулаклыкъгъа чыгъарыб, тутаргъа тебрегенлеринде, атам, энчи ёкюл да алыб, Москвагъа барыб, Калининнге тюбегенди. Тюбеб, хапарын да айтханды. Калинин аны ишчи къолларын кесиникилеге алыб, берчлерине сейирсиниб тийгенин айтыучан эди.
– Быллай къоллары болгъаннга «кулак» деб айтыргъа кёллери къалай барады? Бар, чыртда сагъыш этме, мындан ары сени тынчлыгъынгы киши бузарыкъ тюлдю, – деб ашырады...
Къазауатда да болады Локъман. Анда да джанын-къанын аямай, уруш этеди. Артда юйдегисине Орта Азияда тюбеб, алайда биягъы къойчулукъгъа джарашыргъа излейди. Алай а ол кючлю, джигер адамны, фронтовикни, сют фермагъа бригадирликге саладыла, артда уа колхозну председателини орунбасары этедиле. Бери, Кавказгъа, къайтхандан сора биягъы къойчу хыджысын къолуна алады. Ма анга 1960-чы джыл къойчу нёгер болады Ханапий. Малгъа сюймеклиги элтеди аны эл мюлк институтха да – Новочеркасск шахаргъа. Алай бла, 1968-чи джыл ветеринар врачлыкъ дипломун алыб, Джуртуна къайтады. Ол джылдан бери талай мюлкде баш ветеринар врач болуб да ишлегенди, аспирантурада окъуб, ветеринар илмуланы кандидаты болгъанды. Владимир шахарда Эл мюлк министерствону илму-тинтиу институтунда да ишлегенди. 1984-чю джылдан 2018-чи джылгъа дери уа Къарачай районну баш ветеринар врачы, баш кърал ветинспектору болуб уруннганды. Ол джыллада бир кере районда мал ауруу чыкъмагъанды, алай джарашыб эди ветеринар къуллукъну иши.
Бирси районладача болмай, Хубий улу кеслеринде бютеу ветеринар участокланы, пунктланы чачылыудан, тоналыудан сакълаялгъан эди. Таб, энчи къолгъа тюшюб тургъан ветеринар мекямланы ызына сыйырыб да алалгъан эди.
Малчылыкъны сюйген халкъ болгъаныбыз ючюн, малны санын кёб этерге излеб, аны асыулулугъуна аз эс бёлебиз, деб къыйналады бюгюн да. Болумну тюзетир ючюн бютеу ветучастоклада къолдан ичлендириучю пунктла джарашдыргъан эдиле. Хар къарачай арбазда, эчкилеча, аз сют берген ийнекле, аз джюн берген къойла тюл, асыулу тукъумлу малла болсала, деген нюзюр бла ишлегенди ол. Алай болур ючюн, кючюн, фахмусун да аямай кюрешгенди. Арымай-талмай джамагъатда ангылатыу, юретиу иш да бардыргъанды.
– Элледе малны къолдан ичлендириу иш тохтагъаны амалтын, джылдан джылгъа джамагъат малны тукъумлулугъу бузула келгенди, сюеги чыркым болгъанды, эт, сют, джюн да аз береди. Мал тутхан адамла малны агъачлысы къолдан ичлендириу джорукъ бла байламлы болгъанын иги ангыларгъа керекдиле. Ансы бюгюнлюкде къой, тууар сюрюуледе тукъумсуз къочхарчыкъла, бугъачыкъла джюрютген бла киши да малындан тыйыншлы хайыр кёраллыкъ тюлдю, – дейди ол.
Ханапий ветеринарлыкъ илмуда да айтылгъан алимди. Тюрлю-тюрлю магъанасы болгъан 25 джарагъан илму иш джазгъанды. Ала Къарачай-Черкесияда къой, бютеу Шимал Кавказда ветеринар ишде хайырландырылгъандыла, кёб тюрлю мал аурууну багъыуда джангы, алчы джорукъну-джолну ачыкълагъандыла.
Илмудан эсе да, ишни кесине уллу эс бёлюб, аны къураугъа толусу бла берилгени тыйгъычлыкъ этгенди ансы, Ханапий андан ары да ёсерик эди. «Тохтаб къалма, сенде фахму кюч уллуду», – деб джазгъанды анга ВНИИОК-ну директору, Эресейни Эл мюлк илмуларыны академиясыны академиги (РАСХН), эл мюлк илмуланы доктору, Социалист Урунууну Джигити Василий Андреевич Мороз.
Аныча Ханапийни къыйынына уллу багъа бере, РАСХН-ны член-корреспонденти, профессор Гусев, Эресейни Аграр партиясыны председатели М.И. Лапшин, РФ-ны эл мюлк министрини биринчи орунбасары А.А. Михалёв, Социалист Урунууну эки кере Джигити, академик Мальцев, ветеринар илмуланы докторлары Захаров, Мищенко, Дудников, Байбинов, Рахманов – барысы да къралны бирер онглу алимлери. Ала аны илму, иш джанындан билген бла къалмай, кеси бла къысха байламлылыкъ джюрютгендиле. Аллай адамла, тыйыншлы болмасанг, бошнакъгъа сый берлик тюлдюле, таб, эслеринде да тутарыкъ болмазла, эшта. «Сен ким бла тенглик джюрютгенинги айтсанг, мен да сени кесинги ким болгъанынгы айтырма», деген сёз барды. Ханапий бла шохлукъ джюрютгенле министрледен, академикледен башлаб, тюз ишчилеге, усталагъа дери – барысы да толу адамлыкълары болгъан, деменгили, ышаннгылы адамла эдиле. Асламы керти дуниягъа кетгенди, джандетли болсунла. Ала Хубий улугъа къараб, бизни халкъны, джуртну да сюйгендиле.
«Ханапийча адамларыбыз кёб болсунла», – деб Аллахдан ма аны ючюн тилеученбиз. Кесини усталыгъын сюйген адам, Тобчукъ ёхтемлик бла къайтарыб айтады закий Павловну: «Медицина адамны саулугъун багъады, ветеринария уа – адам улуну», – деб. Юй бийчеси Раиса Григорьевна уа, 60 джылдан асламны аны сынаб айтханча кёрюб, ышарыб къоюучанды баш иесини сёзюне. Ол, Теберди шахарда аты сый бла айтылгъан тиширыу, баш медицина билими болгъан адам, аны бла даулашыб кюрешмейди – магъана джокъду. Аптекада ишлегенди, кесини ишин Ханапий кесиникин сюйгенден аз сюймейди. Ма 60-дан артыкъ джыл экиси – орус тиширыу бла таулу джаш – бирге джашагъанлы. Ол асыулу, огъурлу тиширыу кеси да анычады, кёб ашхы зат айтыргъа боллукъду. Аны иги таныгъан адам, бу тиширыу ишинден бош кёзюуюн андан чыкъмай ашырады, деген бла бирге, ол ариулукъну кёре билген, сюе билген терен адам болгъанын да ангыларыкъды, сейир-тамаша боллукъду. Джюрегинде сезим байлыгъы, уллу суратчылыкъ хунери да бар кёреме, деб кёлюне келликди.
Бир кесек джерчикде гокка хансла, гюл кёкенле, кёгет терекле, ууакъ тахта кёгетле, тюрлю-тюрлю джилек, наныкъ, гургум – къайсы бирин айтхын – онла бла ёсюмлени санарыкъса.
Сейирсиндирген да неди десенг, аланы асламысына Теберди ёзенни хауасыны уллу таблыгъы джокъду – Раяны джюрек, къол джылыууду алагъа ёсерге, джашнаргъа кюч берген. Тебердичилени къой, тёбенледе, джылыракь джерледе джашагъанланы арбазларында да кёрлюк тюлсе аллай ёсюмлени.
– Раиса ол кесек бачхадан алгъан битими бла юйдегини асырайды, – дейди Ханапий. – Алайды да, медицина – адамны, ветеринария – адам улуну саулугъун бакъгъан сагъатда, Раисады юйдегибизни къышхы азыгъын хазырлагъан – гардошдан, алмадан-кертмеден, тузланнган агурчадан, помидордан башлаб, тюрлю-тюрлю татлы ууакъ кёгетден варениелеге, компотлагъа дери, – деб кюледи Ханапий.
Кюлсе да, тиширыууна разылыгъын танытханын ангыларыкъса. Хоншула да Раяны сыйын кёрюб, багъалатыб сёлешедиле. «Тамам бир-бирине тыйыншлы адамладыла», – дейдиле ала.
Алай айтыб, къуру адамлыкъларын, билимлиликлерин чертиб къойгъанлыкълары тюл, джюрек байлыкъларыны, фахмулулукъларыны да бирчалыкъларын чертгенликлериди.
Ханапий чамгъа-накъырдагъа, тепсерге устады. Джырлагъаны уа! Бир къауум джырчыма деб, сахналаны кючлеб тургъан профессионал джырчыланы аны чакълы фахмулары джокъду. Орус романсланы, бирси халкъланы белгили джырларын да ана тилибизге уста кёчюрюб, аламат джырлайды Ханапий. Аны къой назмула да джазады. Ол фахмусу ючюн да сюедиле адамла аны тёгерегине джыйылыргъа. 60-чы джыллада халкъда адет алай болуб, малчы усталыкъ алыргъа тырмашмаса, Ханапий ким биледи, артистликге окъургъа барыргъа да болур эди.
Къызлары Зарета бла джашлары Руслан а ата бла ананы усталыкъларын сайламагъандыла. Зарета юристди, Краснодар шахарда ишлейди. Руслан Ростовда юристлик академияны кърал къуллукъчула хазырлагъан факультетин битдириб, аскерде да къуллугъун тауусуб къайтхан эди да, арт кёзюуде Краснодар крайны окъуу системасында къуллукъчу болуб, атын иги бла айтдырыб ишлейди.
Зарета да, Руслан да толу юйдегиле болуб ариу джашайдыла. Экиси да сабийлерин да алыб юйлерине, Тебердиге, таймаздан келгенлей, Ханапий бла Раяны къууандыргъанлай турадыла. Къууанчлары кёб болсун. Халкъыбызны керти адамы, ашхы джашы Хубийланы Ханапийге туугъанларыны, туудукъларыны, сюйген адамларыны арасында саулукъда-эсенликде энтда кёб джылланы джашаргъа Аллах насыб этсин.
Ханапий къарнашыбызны туугъан кюню бла джууугъу-тенги алгъышлайдыла. Биз да, тенглери, таза джюрекден алагъа къошулабыз.

Какушланы Хусей,
КъЧР-ни махтаулу журналисти.

 
{jcomments}