Мындан алда Хурзук элде «Исламны билген адамла» деген республикан викторинаны бир кёзюую ётдю.

Къарачай-Черкесияны Муслиманларыны дин управлениеси къурагъан бу эришиуге къошулургъа ол кюн Къарачай районну бютеу эллеринден кёб адам келген эди. Викторинаны соруулары ислам культураны, тарихни адетлерини, джорукъларыны юслеринден эди. Эришиуге къошулгъанла Къур’андан, хадиследен, фикхден (ислам законодательстводан), сирадан (Файгъамбарны (гъ.с.) джашау джолундан) эмда башха затладан билимлерин кёргюздюле.
Ахырында тёречиле, эсеблени чыгъарыб, хорлагъанланы баямладыла.
Биринчи орунну Огъары эмда Тёбен Теберди эллени командалары алдыла. Джангы Къарачай бла Къумушну командалары экинчи, Теберди шахар бла Доммайныкъыла ючюнчю орунлагъа чыкъдыла.
– Хорламлы болгъан сабийлени таза джюрекден алгъышлайбыз. «Исламны билгенле» деген викторинача ишле джамагъатны арасында ийман байлыкъны ёсдюрюуге, шохлукъну, къарнашлыкъны бегитиуге себеб боладыла», – дегендиле бу эришиуню къурагъан башчыла.
Ислам викторинагъа къошулгъанланы, хорлагъанланы КъЧР-ни муфтийи Эриккенланы Мухаммад хаджи ачха ёчле бла, Хурмет грамотала бла саугъалады. Барын да озгъан къауумгъа 50 минг, экинчи орунну алгъанлагъа 30 минг, ючюнчю оруннга чыкъгъанлагъа да 20 минг сом берилди.

ЁЗДЕНЛАНЫ Якъуб.