Россияны регионларындан ол фестивалгъа баргъан делегацияланы адамлары алайгъа - джаш тёлю бла студентлени Х1Х-чу Бютеудуния фестивалына - тышындан келген къонакълагъа да, башхалагъа да, кеслерини регионларында болумдан, аланы айныу джолларындан, туристлени юйюрсюндюрген сейирлик джерлери бла ашхы затларындан, регионларын айнытыр ючюн, къаллай проектлени эмда кеслерини чыгъармачылыкъ планларын къалай хайырландыргъанларыны юслеринден хапар айтдыла.
КъЧР-ни Башчысы, ол кюн фестивалгъа къошулгъанла бла да, Кърымдан, Ингуш эмда Шимал-Тегей Алания республикаладан, эмда Къарачай-Черкес Республикадан келген делегацияланы адамлары бла да тюбешиб, сёлешгенди. Ол ушакъладан сора кёлюне келген оюмну айта, Инстаграмда кесини энчи бетинде былай билдиргенди: «Ала барысы да - терен фахмулу, кёб ашхы оюмла бла нюзюрлени эмда джангы башламланы авторлары болалгъан джаш адамла - кеслерини болумлулукъларына таяна, база билирге, хорламлагъа бирча учунуб, алгъа бирден, таукел барыргъа керекдиле. Фестивалны къуралгъаны бла юретгенини магъаналары да ол затлагъа чакъырыуду.
Быллай, байрам халда баргъан уллу фестивалгъа къошулгъанланы барысын да, аланы ичинде Къарачай-Черкесияны келечилерин да, энтда бир кере алгъышлайма. Кесигизге толу ийнаныгъыз, ол заманда муратларыгъыз да толмай къаллыкъ тюлдюле», - деб джазгъанды джаш адамлагъа кёл бере.
Ахырында, фестивалны джабыу ишлеге Белавенцев Олег да, Россияны регионларыны башчылары да къошулдула. Россияны Президенти Владимир Путин да ол фестивалны ишине къошулгъан къонакъланы алгъышлай: «Сиз Россиядан кетгенликге, джюреклеригизни бирер кесегин мында къоя барлыкъсыз. Алай болса да, Россия сизни джюреклеригизде ёмюрлюкге къаллыкъды. Биз сизге ийнанабыз!» - дегенди.
Фестиваль октябрны 14-ден 22-не дери кюнледе болгъанды. Ол байрамны бардырыргъа 180 къралдан 20 мингден аслам джаш адам - джамагъат организацияланы келечилери бла устазла эмда политикле - келген эдиле.
