Къарачай-Черкесияны Башчысы Темрезланы Рашид 2025-чи джылны бизни республикада «Год демографического роста, рождаемости и долголетия» деб  баямлагъанды.

Аны юсюнден Башчы кесини Телеграм-каналында: «2024-чю джыл тауусулду, Джангы джыл башланды, аны бла ашхы умутларыбызны, ашхылыкъланы, ёсюмню байламлы этебиз.
Талай ведомство эмда джууаблы къуллукъчу келишиулю ишлегенлери бла Къарачай-Черкесияны джеринде байрам кюнле тынчлыкълы ётдюле, хар адам да къоркъуусуз болумда Джангы джылгъа джарыкъ тюбер мадар табды.
Бизни рахатлыгъыбызны сакълагъанланы барына да джюрек разылыгъымы билдиреме.
Ата джуртубузну политикасын СВО-да джакълагъан аскерчилерибизге да бек разыма. Эресейни Президенти Владимир Путин, тамблагъы кюнюбюз джарыкъ болуруна ышандыргъан аскерчилерибизни джигитликлерине сый бере, 2025-чи джылны бютеу къралда Ата джуртну къоруулаучуну джылы деб баямлагъанды.
Президентибиз демография болумну игилендириу бла байламлы салгъан борчланы иги толтурур муратда мен да бу джылны Къарачай-Черкесияда «Год демографического роста, рождаемости и долголетия» деб баямлайма. Бу оноуума кёре план салыб, аны джетишимли толтурургъа кюреширикбиз. Джангы башланнган джылда юйдегилени джашау турмушларын игилендириуге аталгъан ишлеге баш магъана берликбиз, алагъа кёлтюргючлюкге къуралгъан мадарланы бусагъатдан да кёбюрек этерикбиз.
Багъалы джердешлерим! Бир иннетде бириксек, баш нюзюрюбюзге джетерикбиз. 2025-чи джыл деу Эресейни джетишимли, хорламлы джылы болуруна ийнанама», – деб джазгъанды.