Республикабызны школларында юлгюлю сохтала бла окъуучуларыбызны шагъырей этгенлей барабыз.

Важное элден Эдиланы Хыйсаны джашы Сейит да айырмагъа окъугъан, башхалагъа ашхы юлгю кёргюзген джашчыкъланы бириди.
Сейит биринчи классдан башлаб къуру «бешлеге» окъугъанды. Школла арасы спорт эришиуледе, олимпиадалада, фестиваллада да, Сейит школну атындан къошулуб, атын айтдыргъанлай келеди. «Уллу къазанда бишген эт чий къалмаз» дегенлей, Сейит тёрт сабийни бири болуб ёсгени себебли, кесинден гитчелеге атасы-анасы юретгенилерича, болушханлай турады. Аны элде тенглери сыйын бек кёредиле. Атасы Хыйса да кесини заманында ол школда юлгюлю сохталаны бири болгъанды. Анасы сабий садда сабийлени кесиникиледен башха кёрмей, джюрек джылыуун бере, ана кёзден къараб, хар бирин да алай юретеди. Алайды да, намыс, адеб, адамлыкъ баш орун алгъан керти таулу юйдегиде ёсгени аны кесини джюрютгенинде да танылады.
Быйыл Эдиланы Сейит 9-чу классны айырмагъа тамамлагъанды. Кеси да экзаменлени джетишимли бериб, къызыл аттестат (особого образца) алгъанды. Сюйген школунда андан ары окъургъа кёзю къараса да, усталыкъ алыргъа къаст этиб, Черкесскеде Шимал Кавказ кърал академияны колледжине окъургъа киргенди. Бюгюнлюкде колледжни «Строительство и эксплуатация зданий и сооружений» факультетини студентиди. Гитчеликден окъургъа талпымакълыгъы болгъан джаш мында да айырмагъа окъуйду.
Алайды да, элчилерине, миллетине, къралына махтау, сый келтирген адамларыбызны атларын къайда эшитсек да, туугъан адамыбызны атын эшитгенча болуб, башыбыз кёкге джетгенча бир къууанабыз. Сейит да онглуланы, ашхыланы тизимине къошулуб, уллу джетишимле этиб, къралына, миллетине да хайырын джукъдургъан адам боллукъду деб ышанабыз.

БОКАЙЛАНЫ Фатима.