Бир талай ай да болады, хар адамны юсюнден джазыб, бир джерге джыйышдырыргъа таблыкъ барды, алай эсе уа, миллетибизни тарихин джыяргъа, сакъларгъа хыйсаб чыкъгъанды деб, хапар джюрюгенли.
Аны юсюнден кескинирек айтыб, газет окъуучулагъа да ангылатса изледик джамагъат къуллукъчу Ёзденланы Шарафатдин.
– Алгъы бурун «Къарачайны» окъуучуларына тынчлыкъ-эсенлик теджейме. Келе тургъан джыл огъур джыл болуб, джер джюзюне мамырлыкъ орналсын, миллетле къууанч бла рахатлыкъда джашасынла.
Окъуучулагъа, бютеу миллетибизге билдирирге излейме – интерактив сайт дегенни магъанасы уллуду, артыкъсыз да тарихибизни джыйыуда. Бери хапарла, суратла, роликле, архив къагъытла, айтыргъа, хар тукъум кесини юсюнден тарихин джыяды. Бусагъатда сайтла кёбдюле. Кърал Башчы да салады сайтха къайры баргъанын, кимге тюбегенин. Аны айтханым, заман кетсе, унутулгъан этеди. Ол себебден, бусагъатдан башлаб, хар ким тукъумуну, юйдегисини юсюнден эшитгенин, билгенин, сайтха джыя барса, ол анда ёмюрлюкге сакъланныкъды. Керек заманда ачды да къарады. Китабча эски боллугъу, джыртыллыгъы джокъ. Ансы, тукъумланы юслеринден бек иги китабла джазылгъандыла. Сора дагъыда сайтны бир игиси, китаб джазылгъаны бла тохтаб къалады, ызындан джукъ къошалмайса. Бери уа джангы туугъан сабийлени да къошуб барыб турлукъса. Джукъну терс джазгъанынг болса, кетерирге, тюзетирге да боллукъду амалынг.
Дагъыда бир таблыгъы – талай адам бир-бирин кёрюб, тансыгъын алыргъа, ушакъ этерге, оноулашыргъа болады.
Быллай интерактив сайт бир джерде да джокъду. Аны этер ючюн мелиуанла джояргъа керек болады. Ол джоюмланы сууаблыкъгъа деб, профессорубуз Тамбийланы Хасанны джашы Аубекир хаджи этгенди, бу ишге башчылыкъ да кеси этеди. Сайтны джарашдыргъан а къарачай джашчыкъла бла къызчыкъладыла. Не Къытайдан, не Америкадан келген зат тюлдю. Кесибизникиле этгендиле. Къадалыб, барыбыз да бу ишге таукел къошулсакъ, унутуллукъну да унутдурмазбыз, тас боллукъну да сакъларбыз. Миллетибизге къайгъырыб джашаргъа керекбиз хар бирибиз да, кече да, кюн да, тюнде, тюшде да. Миллет бла бирге болургъа керекди сагъышыбыз.
Тукъум тамадаланы къайгъырыулары бла бюгюннге 108 тукъум кеслерини тарихлерин джыйышдыргъандыла. Энтда къайтарыб айтама. Юйдегисине, тукъумуна, миллетине бу интерактив сайтдан иги джукъ этеллик болмаз адам. Бютеу тукъумла да джыйышдырсала, миллетибизни тарихи болуб къаллыкъды. Он джыл, джюз джыл кетсе да, къарт аталаны, къарт аналаны суратларына къараб, ариу, сабыр сёлешгенлерине тынгылаб, тансыкълаб, къаллай бир хурмет табарыкъдыла тёлюле. Хар ким кесини телефонунда сакълагъанча болмай, анда бир тас болады, бир телефонунг сынады, сайтда бир джерде боллукъду бютеу тукъумланы тарихи. Хар тукъумда онглу адамла бардыла, къазауатлада джигитлик этгенле, урунууда джигитлик танытханла, халкъ джигитле, джамагъат къуллукъчула, алимле, джазыучула, спортсменле, башхала. Аланы да хапарларын, суратларын салыргъа тыйыншлыды. Тышында джашагъан ахлуларыбыздан да джыярыкъбыз. Алай бла тарихибизни джыйышдырыргъа, биригирге, бир-бирибизге иги болургъа уллу себеб боллукъду бу сайт. Бюгюн биз эсде тутханлыкъгъа, тамбласында тёлюле биллик тюлдюле, кимни ким болгъанын. Кърал архивде да сакъланырча этерге тыйыншлыды. Сора бу юйдегили болургъа тебреген джаш адамла да, джууукълугъу бармыды, джокъмуду, эрлай огъуна къараб, билиб къоярыкъдыла. Айтыргъа, не джаны бла да магъаналы ишди. Бютюн да игиси уа – бир джерге джыйылгъанла бир-бирлерине да иги боллукъдула. Миллетибизни бирикдирирге болушурукъду бу иш. Джангы джылгъа дери джыйышдыргъанла ачха тёлерик тюлдюле. Артда тёлерге керек боллукъду.
Хапар билирге излегеннге: тел. +7(928)655-52-56, Телеграм-канал: @famili_trad24.
