Эндреуюк (декабрь) айны 20-да Терезе элни Джарыкълыкъ юйюнде Эресейни Джигити Чочуланы Адемейни джашы Харунну 105-джыллыкъ юбилейи бла байламлы уллу джыйылыу болду.

Джигитни эсгериуге аталгъан ингирге къошулгъанла Джарыкълыкъ юйюню уллу залын толтургъан эдиле. Ары район тамадала, джамагъат къуллукъчула, Харунну эт-джен адамлары, сохтала, устазла, тюз элчиле келген эдиле.
Эсгериу ингирни ача, джыйылыуну бардыргъанла, алгъы бурун Чочу улуну джашауундан, уруш джолундан къысха хапар айтыб, Гитче Къарачай районну администрациясыны башчысы Байрамукъланы Рамазаннга сёз бердиле.
– Быллай ишлени, Джигитлерибизни эсгериуге, алагъа сый бериуге багъышланнган джыйылыуланы къурау бизни районда эртдеден да ашхы адетлени бириди. Уллу Ата джурт къазауатха 368 джашын ашыргъан Терезе эл, Эресейни Джигити Чочуланы Харунну аты аталгъан школ, ол джаны бла тирилик танытханлай турадыла. Уллу Хорламны 80-джыллыгъына да элчиле, иги хазырланыб, бу тукъум ишлени мийик дараджада бардырыллыкъларына ишегим джокъду. Уллу Хорламны магъанасын, сыйын ёсюб келген джаш тёлюге ангылатыргъа, аланы патриотлукъгъа юретирге барыбызны да борчубузду. Джарыкълыкъ юйню аллында, уллу джолну джанында, эсгертмеге ариу халда къараб, тышындан келген адамла да бюсюреу-сыпас этиб кетерча этесиз, андан да ариу этсегиз элибизни, районубузну, республикабызны сыйларына сый къошуллукъду, – дегенни айтыб, бу ишни къурагъанлагъа разылыгъын билдирди.
Ызы бла бир-бири ызындан сахнагъа чыгъыб, Чочуланы Харунну бир элчилери, аны таныгъанла, билгенле хапар айтдыла.
– Харунну иги таный эдим. Бир кёзюуледе элде «халкъ дружинаны» (ДНД) бирге бардырыучан эдик, – деб хапарлады аланы бири, элде Къазауатны, урунууну ветеранларыны советини тамадасы Эриккенланы Ибрагим. – Джорукъну сюйген, хар нени да деменгили, тамамлы болурун излеген адам эди. Тышындан къарагъаннга къатыракъ джюрекли адамча кёрюннгенликге, джумушакъ, халал, джууаш адам эди.
– Фашист концлагерлени, партизан джашауну, кёчгюнчюлюкню азабын кёргенликге, ненча кере ёлюмню бетине къарагъанлыкъгъа, джаны, саны да инджилгенликге, ол халал джюреклилей къалгъан эди, – деб эсине тюшюрдю аны Орусланы Магомед да – МВД-ны ветеранларыны район советини председатели. – Уллугъа уллуча, сабийге сабийча сёлеше эди. Аз да махтанчакълыгъы джокъ эди, къазауатны юсюнден хапар айтыргъа да хазна излемеучен эди…
Ол халда эсге тюшюрдюле, сый бериб сёлешдиле Джигит Харунну юсюнден Терезе элни администрациясыны башчысы Баиланы Казбек, тукъум тамада Чочуланы Азрет, «Къарачай – алан халкъ» джамагъат бирлешликни Гитче Къарачайда бёлюмюню башчысы Байчораланы Мурат эмда башхала.
«Къарачай – алан халкъ» джамагъат бирлешликни тамадасыны орунбасары Боташланы Сулайман, бу ишни къурагъанлагъа бюсюреу-сыпас этиб: «Быллай ишле джаш тёлю ючюн этиледи» дегенни айтыб, талай адамгъа «Къарачай – алан халкъны» атындан Хурмет грамотала берди.
Сахнада сохтала Чочуланы Харунну уруш джолларындан хапар айтхан литература композиция кёргюздюле, назмула окъудула. Фахмулу артистле Боташланы Бэла, Борлакъланы Рустам, Ёзденланы Кямал аламат джырладыла.
Эсгериу ингирни ахырында Терезеде, Ючкекенде да Уллу Ата джурт къазауатны Джигитлерине салыннган эсгертмеге барыб, дууа этдиле, гокка хансла салдыла, суратха тюшдюле.

ЁЗДЕНЛАНЫ Якъуб.