Джаш тёлю бла студентлени Сочи шахарда баргъан Х1Х-чу Бютеудуния фестивалларында Россияны регионларыны экспозицияларыны кёрмючю къуралгъан эди. Ол ишге Къарачай-Черкесия да къошулуб, республиканы халкъларыны бурундан бери да тёлюден тёлюге кёче, сакълана келген миллет культураларын, табигъатыны сейирлик джерлерин, регионда туристлик хыйсабы бла джаш тёлюню республикада хайырландырылыб тургъан аламат проектлерин кесини презентация стендинде салгъанды. Джер юсюню узакъ эмда джууукъ джерлеринден Сочиге келгенледен КъЧР-ни стендине къарагъанлагъа алтын оюула тигиб салыуну хакъындан мастер-класс да къуралгъан эди алайда. Аны кибик, фестивалны къонакъларына, ол стендге къараб, Къарачай-Черкесияны таурухлу джерини табигъатына экскурсиягъа баргъанча, таб, джомакълы Хурла Кёлню къатында ариулукъну кёзлери бла кёрюб къайтхан кибик болурча таблыкъла къуралгъандыла.
Фестивалгъа 180 къралдан джыллары 18-ден 35-ге джетген джаш устала келген эдиле. Ол уллу джыйылыугъа КъЧР-ни атындан 65 адам къошулгъанды. Джаш тёлюню аллай байрамына Россияны башха шахарларындан да кёбле келгендиле. Биринчи юч кюнню ичинде фестивалгъа тыш къралладан келгенлени саны эки минг адам болгъанды. Ол форумгъа къошулгъанла, Сочиден сора да, Россияны 15 регионун джокъларыкъдыла.
УЗЕИРЛАНЫ Хусеин.
{jcomments}
