Октябрны 18-де «Бирикген Россия» партияны Баш советини бюросуну Москвада уллу кенгеши болгъанды. Анга КъЧР-ни Башчысы Темрезланы Рашид да къошулгъанды.
«Бирикген Россияны» пресс-къуллугъу билдиргеннге кёре, Баш советини председатели Борис Грызлов джыйылгъанланы ётген ыйыкъда этилген магъаналы партия оноула бла шагъырей этгенди. Аны бла бирге айырыб эс бёлюрге тыйыншлы юч затны (халкъны джашау болуму бла социал-экономика ёсюмню, тыш политиканы, къраллыкъ бла политика ишлени) юслеринден партияны Баш советини ишчи къауумлары джыл сайын докладла эте турсала деген оюмну да теджегенди.


«Бюгюнлюкде биз дженгил тюрлениучю дунияда джашайбыз. Халкъла арасы болумну алай тынч болмагъаны, кеси джамагъатыбызны излеми да ёсе баргъаны Партияны аллында джангы борчла саладыла. Ол себебден къралны джамагъат-политика джашауунда бек керекли затланы юслеринден материалла хазырлауну тыйыншлыгъа санайма. Аллай докладланы Баш совет джыл сайын этиб барыргъа керекди», - деб билдиргенди Грызлов. Ол айтыудан, ишчи къауумланы аналитика материаллары  артда документлеге тамал болуб къалгъандыла. Аланы уа халкъла арасы тюбешиуледе, Программа комиссияны кенгешлеринде, фракцияны джыйылыуларында, партияны бирси мероприятиелеринде хайырландырадыла. Юч къауум да, Партияны программасына таяна, кеслерини докладларын бир къат хазырлагъандыла. Хар докладны ёзеги Россияны социал-экономика ёсюмюнде, халкъла арасы байламламлыкъда эмда къраллыкъ джюрютюуде алдагъы борчларын кёргюзген информацияды. Аны бла бирге алада кескин оюмла, башламчылыкъ, перспективалы регионланы алчы сынамлары да бардыла. Къысхасы, докладлада Партияны иннети танылыб тургъанын черте, алада айтылгъан ашхы башламланы джашауда тири бардырыргъа чакъыргъанды Грызлов.
Къарачай-Черкесияны Башчысы Темрезланы Рашид бизни республика ол ишге тири къошуллугъун билдире, джыл сайын этиллик докладлада  КъЧР-ге тийишген джарсыулагъа да олсагъатда орун табыллыкъды, деб чертгенди.
Ишчи къауумну тыш политика бла байламлы координатору Вероника Крашенинникова анга джууабха аны доклады Партияны Баш советини, регионланы тамадаларыны, экспертлени оюмларындан къуралгъанын айтханды. Кенгешни бардыргъанлагъа ол быллай оюмну да эшитдиргенди: къралны тыш политикасын бардырыуда «Бирикген Россия» партияны орнун кескинлеб, аны стратегия магъаналы оюмларын ачыкъ билдирирге керекди. Айхай да, халкъла арасы аренагъа чыкъгъан сагъатда «тюзлюк», «суверенитет», «законну бийлиги» дегенча принциплени къаты тутмай мадар джокъду.

 
{jcomments}