Табигъатны эм ариу, мийик тауларыны бири, Доммай-Ёлген тау, Доммай посёлокдан 10 километр узакълыкъдады.

Ол Доммайда эм мийик таугъа саналады. Аны юч башы барды, кюн чыкъгъан джанындагъыны мийиклиги 3950 метрди, кюнбатхан джанындагъы 4036 метрди, эм мийиги 4046 метрди. Аны ариулугъундан сора, таблыгъы да барды, ары улоу барады.
Бурун заманда мында доммайла кёб болгъандыла, ала сюрюу-сюрюу айланнгандыла, тюрлю-тюрлю чурумла бла аз бола барыб, джюрюген айтыугъа кёре, ахыр доммай бу тауда ёлгенди. Къарачайлыла анга «Доммай-Ёлген» деб, аны ючюн атагъандыла.
Тауну джитилерин хаман да къар басханлай турады. Ол джылны къайсы бир заманында да бек ариуду. Джай аны къабыргъалары, тик бетлери, малахит бла джабылыб, тамам сейир кёрюнедиле. Аланы юслери бла джылтырагъан таза суула джырлай, шоркъулдай барадыла. Ол къачда сап-сары болуб, чий алтыннга ушайды. Адам ол аламатлыкъгъа къараб тоялмайды. Къыш болса, бу деу, акъ джабыугъа бёлениб, кюмюшча, джылтырайды. Тау, алай тургъанлай, сланцеледен, гнейследен, сослан ташдан, башхаладан къуралгъанды. Джай аны бузларындан эриб баргъан суула регионну Къобанны толтурадыла.
Туристле аны бек сюедиле, Доммайда мийик тауну башына ёрлерге излеб, алайгъа кёб барадыла. Тауну эм башына чыкъмай, аны ариулугъуна арлакъдан къараб, сюйюннгенле да кёбдюле.
Мында хауа бек тазады, дарманлыды, суула да алайдыла, ала бары да адамны саулугъун бегитирге себеб боладыла. Табигъатны бу таурухлу мюйюшюне келиб, бу хауаны тогъуб, сууладан ичиб, ариулукъдан, сейирликден кюч алгъанла кёбдюле. Ала, мында саулукъларын тюзетир мадар табыб, къууаныб, джюрек джылыуларын тёгерекге джая, ашхылыкъ этерге учунадыла.

Узеирланы Хусей.