Текеланы Мудалифни къызы Земфира 1977-чи джыл Гитче Къарачай районну Первомай элинде туугъанды. Земфира 4 сабийни анасыды, бусагъатда Ючкекен элде джашайды.
Баш иеси Долаланы Дахир ауушханлы талай джыл кетсе да, сабийлерин, ата керекли этмезге кюрешиб, кирсиз, адебни, джорукъну, намысны сингдире, ариу халиде ёсдюреди.
Уллу джашы Рамазан, 9 классны бошагъандан сора, Ючкекенде механик-технолог усталыкъ берген училищеге кириб, быйыл аны кесине, анасына да махтау, бюсюреу къагъытла берилиб, джетишимли бошагъанды. Окъуй тургъанлай, бош заманында электрик усталыкъгъа, агъач керек джыяргъа юрениб, усталаны биргелерине ишлеб, хайыр да келтире, «гитче бармакъ да асыуду» деген айтыуну кертилигин кёргюзе, анасын къууандыргъанлай тургъанды. Училищени бошагъаны бла тохтаб къалмай, баш билим алыргъа излеб, Пятигорскеде Шимал Кавказ федерал университетге окъургъа киргенди. Бусагъатда да, бир ишден артына турмай, бош кёзюуюнде не тюрлю усталыкъгъа да юреннгенлей турады.
Абадан къызчыгъы Альбина да, 9-чу классны айырмагъа бошаб, Нарсана шахарда медицина училищеде джетишимли окъуйду. Эгизле – джашчыкъ Динислам бла къызчыкъ Диана – 8-чи классны сохталарыдыла.
Земфира сабийлени джалкъаулукъгъа бошламай, юйде не тюрлю джумушха да юретгенлей, бачха ишлеге да болушдуртханлай, ариу халиде ёсдюреди. Ала къарт аналарыны кереклисине да къарай, хоншугъа-тийреге да эс бёлгенлей, къартны, джашны да сыйларын кёргенлей турадыла. Кеслери да, аналарыча, джууукъ кёллюледиле. Аланы юйлери къуру да къонакъдан толгъанлай турады.
Земфира чемер къоллу, джигер аналаны бириди. Аны керти аламат иши уа - сейирлик гырджынларыдыла, нартюх гюттючюклери! Аланы татыуларын бир кёрген, экинчи да къайтарыб-къайтарыб алмай къоймайды. Не кюйдюрмей, не чий къалдырмай, бирчачыкъла, суратда салыннганча, алай ариу биширеди. Кеслерин да тюрлю-тюрлю нартюхлени унларындан, адамланы излемлерине кёре, этеди: бирлери акъ нартюхню унундан, экинчилери - сары нартюхнюкюнден, ючюнчюле - акъ бла сары къатышхан ундан.
Земфираны нартюх гырджынчыкъларыны хапарларын эшитгенле, билгенле, Гитче Къарачай, Джёгетей Аягъы район, Черкесск эмда Нарсана шахар бла къалмай, Ставрополь, Невинномысск, Пятигорск дагъыда башха джерледен, тилеб этдиредиле. Не кеслери келиб аладыла, не танышла бла, не бир баргъан улоу бла ийдиртедиле. Аланы ичинде узакъ джерледен Нарсанагъа келген туристле да, гырджынчыкъланы татыуларын унутмай, телефон бла сёлешиб, посылка бла ашыртадыла.
Алай бла, хурметли, джигер ана Къарачайны бурундан келген хантын, кесини миллетине джайгъан бла къалмай, башха джерледе адамлагъа да белгили этеди, къарачай халкъны да атын айтдырады.
Нартюх гырджынны татымлылыгъын, ёз тутууун айырыб айтыргъа тыйыншлыды. Ол шартлары бютюн да бек оразаны заманында ачыкъланады. Адамла, алайлыгъын эсгериб, ораза айда бек сюйюб аладыла нартюх ундан этилген кирсиз, «къызыллары бла акълары тёгюле тургъан» гырджынчыкъланы.
Уллу Аллахдан юлгюлю анагъа мындан ары да, сабийлеринден къууана, аланы насыбларын кёре, узакъ ёмюрню джашаргъа буюрсун, деб тилейбиз.
Тебуланы Салимат.
