Эндреуюк (декабрь) айны 5-де Черкесск шахарны Ленин атлы майданында эртденбла 10 сагъатда Донецк Халк Республиканы шахарларында, эллеринде бардырылгъан урушлада Къыбыла аскер округну аскерчилери ВСУ-ну эмда НАТО-ну къурамында къралланы келечилеринден сыйырыб алгъан техниканы кёрмючю ачылгъанды.
Бу иш Уллу Хорламны 80-джыллыгъыны аллы бла джердешлерибизни СВО-да бола тургъан затладан хапарлы этер мурат бла этилгенди.
Хыныракъ кюн болса да, ол кюн кёрмючге къараргъа бек кёб адам джыйылгъан эди. Алайда уллу, гитче да бар эди. Бек кёб юйдеги къартлары, сабийлери бла да келиб тура эдиле. Алайгъа джыйылгъанла барыбыз да окъ-тоб бла джер-джерлери тешилген техникагъа бек сейирсиниб къарадыкъ. Аланы юслеринде алгъын Эресей бла шохлукъ джюрютюб тургъан къралланы белгилерин кёрюб, бек къыйналдыкъ.
Къарт аталарыбыз, къанлы урушла бардырыб, миллетчиледен азатлаб айланнган къралла бюгюнлюкде бизге къаршчы болгъанларына тыхсыб, кёзлеринде ойнай тургъан джыламукъларын сюртгенле кёб болдула.
Кёрмючде тизилген аскер кереклени, тюрлю-тюрлю окъну-тобну атхан машиналаны къатларында сюелген аскерчиле, аланы юслеринден кёрмючге баргъан адамлагъа хапар айта эдиле.
Узакъдан эшитгенча болмай, ол устала аллынгда тургъан машина къалайда урушда болгъанын, аны ичинде французла, чехле, аны кибик башхала бизни аскерчилерибизге къаршчы кюрешгенлерин, аладан ол къалай сыйырылгъанын айтыб баргъан заманда мени кесими бек кёб тюрлю сезимле кючледиле. Бир джаны бла аскерчилерибизге къоркъгъанымы, бир джаны бла уа, джигит аскерчилерибиз ВСУ-ну эмда НАТО-ну Эресейге къаршчы урушха чыгъаргъан эм кючлю техникасын сыйырыб келгенлери бла ёхтемленнгеними ачыкъ сездим. Башхала да, тамам алай болуб, не къадар кёб затны кёрсек, эсибизге алсакъ дегенча, тёгерекге бек эс ийиб къарай эдиле.
Алайда уа, башында айтханымча, Эресейге къаршчы къралланы бек кёб тюрлю техникалары, сауутлары-сабалары бар эдиле, «Великие Победы России» деген кёрмюч-инсталляция да къуралгъан эди. Республиканы артистлери, патриот джырла джырлаб, кёрмючге баргъанланы кёллерин джарытыб турдула.
Алай бла, кёрмюч ачылгъан кюн бек кёб адам, бизни аскерчилерибиз къаллай кюч бла сермешиб, алгъа чыгъыб баргъанларын кёзлери бла кёрюб, Эресейни кишиге хорлатмагъан аскерлерине бюсюреу этдиле.
Кёрмюч ыйых кюн, эндреуюк айны 8-де, джабыллыкъды. Заманын къызгъанмай, анга къараргъа баргъан сокъуранныкъ тюлдю.
СОЛТАНЛАНЫ З.
