Украинада аскер къаугъа башланнганлы, анга Къарачай-Черкесиядан бек кёб адам, кеси разылыгъы бла, къошулгъанды.
Ала, Уллу Хорламны келтирген ата-бабаларыбызны сырын тартыб, къралыбызны политикасын джакълар ючюн, джанларын-къанларын аямай, къанлы урушлада уллу джигитликле этедиле.
Аскер къуллукъларын махтаулу толтуруб, тюрлю-тюрлю медаллагъа, орденлеге тыйыншлы болгъан джигит уланларыбызны саны кюнден кюннге ёсе барады. Аскер кесаматлары тауусулгъан джашла, джаралы болуб госпиталлада джатыб чыкъсала да, юйлеринде къалыргъа унамай, эс джыйгъанлары бла джангыдан аскерге кетгенлерин кёрюб турабыз.
Солургъа юйлерине келген кёзюулеринде да ата-ана балалары къайтханына къууанч этерге излеселе да, джашланы кёбюсю аны унамайды. «Тенглерибиз отха-суугъа кире тургъан кёзюуде мен къурманлыкъ тепсиледе олтурлукъмамы? Хар не да Хорлам бизники болгъандан сора этилир», - дегенле кёбдюле. Ма аллай, Ата джурту, джамагъаты, тенглери ючюн, хакъ къуллукъ этген джердешлерибизни бириди Джёгетей Аягъындан Батчаланы Башир да.
«Аскер къаугъа башланнган кёзюуде телевизор бла аны юсюнден джангылыкълагъа бек сагъайыб къарай эдим. Тенглерими бир къаууму аскер къуллукъларын СВО бардырылгъан джерледе эте эдиле да, алагъа бютюн да бек къайгъыра эдим.
Кёб турмай, аскер сынамым болгъаны себебли, меннге да БАРС-ны (боевой армейский резерв страны) къурамына кирирге деген чакъырыу келди. Ары къошулгъанымдан сора, бюгюн-тамбла дей, арадан кесек заман ётдю. Анда бола тургъан ишлени, джергили миллетге джетген зорлукъну кёре тургъанлай, юйде олтурургъа тёзюмюм джетмей, кеси разылыгъым бла мен да аскер къаугъагъа къошулдум», - деген эди Батчаланы Башир аскер къаугъаны ал кёзюуюнде ушакъ этгеникде.
Кеси айтхандан, Башир кесаматны тамалында къралыбызгъа хакъ къуллукъ 2014-чю джыл этиб башлагъанды. Мобилизация башланнгынчы РФ-ны Къоруулау министерствосу бла этген кесаматыны болджалы тауусулуб, ол юйюне къайтыб тургъанды.
Мобилизация башланнганында Батча улу, Джёгетей Аягъы районну аскер комиссариатына барыб, аскер къаугъагъа къошулургъа излегенин билдиргенди. Анда ишлегенле терк огъуна уллу сынамы болгъан аскерчини мобилизацияны тамалында «Сторожевая» аскер бёлекден биринчи кетерик 34-чю бригаданы къурамына къошуб, алгъа джангы чыкъгъан аскер сауутну-сабаны джюрютюрге юренирге, ызы бла да СВО-гъа ашыргъандыла.
Алай бла, Батча улу Херсон областха тюшгенди. Анда бек къанлы урушлада болгъанды. Баширни аскер бёлеги болгъан джерге башындан окъ-тоб атылыб, талай кере джаралы да болгъанды. Аллах сакълаб, кёб чабыуулдан саулугъуна уллу заран джетмей, аскерчилени сафларында къалгъанды. Бир кере уа, ауур джаралы болуб, госпиталгъа да элтилгенди. Анда медикле, ариу къараб, къысха заманны ичинде аякъ юсюне салгъанларын айтыб, Башир алагъа уллу бюсюреу этеди. Медицина къуллукъчуланы кючлери бла бир кесек эс джыйгъанындан сора ол, тенглерине билек болургъа ашыгъыб, ызына фронтха кетгенди.
Анда кёб миллетли аскерчиледен къуралгъан тахса алыучу бёлекни къурамында къуллукъ этгени амалтын, биз аны ишинден толу хапар айталмайбыз. Алай болса да, Эресей Федерацияны Сауутлу кючлерин алгъа чыгъарыргъа уллу юлюш къошханын чертерге излейбиз.
Батчаланы Баширни джигит аскерчи болгъанына, Ата джуртубузгъа уллу сюймеклиги бла, джанын-къанын аямай, къралыбызны политикасын мийик дараджада джакълагъанына аны кърал саугъалары шагъатлыкъ этедиле. Аскер къаугъаны кёзюуюнде ол Жуковну эмда Суворовну медаллары бла да, «За храбрость» деген экинчи дараджалы медаль бла да саугъаланнганды.
Башир къарачай, орус, азербайджан дагъыда башха миллетлени келечилери тахса алыргъа тебреселе, бир-бирлерине къарнашлача базыб, бир-бирбирлерине билек болуб баргъанларын, не къыйын болумгъа тюшгенни да бирге чыгъаргъанларын чертеди.
«Ата джуртубуз Эресей барыбызгъа да бирча багъалыды. Аны политикасын джакълар, башхалагъа бойсундурмаз иннетибиз бизни неден да иги бирикдиргенди. Кючюбюз бирликдеди. Аны ангылаб, аш-суу, джылы кийимле, аны кибик башха керекли затларыбызны джибериб, тылдан бизге дагъан болуб тургъан адамлагъа джюрек разылыгъымы билдиреме», - дейди Башир, СВО-дан салам бере.
Биз да, Батча улугъа да, аныча, патриот сезимлерине берилиб, бу къыйын кёзюуде бизни тынчлыгъыбызны сакълар ючюн, Ата джуртубузгъа хакъ джюреклери бла къуллукъ этген джигитлерибизни барына да джылы салам бере, хорлам бла, къууанч бла къайтырларын ашыгъыб сакълагъаныбызны айтабыз. Аллах аскерчилерибизни барын да юйлерине сау-эсен джыйсын!
БАЙРАМКЪУЛЛАНЫ Зульфия.
