Къарачай-Черкесияны Халкъ Джыйылыууну (Парламентини) депутатлары Ата джуртну джаудан сакълагъан 34-чю мотоатыучу бригаданы аскерчилерине гуманитар болушлукъ ашыргъандыла. Анда бизни джердешлерибиз кеслерини борчларын бет джарыкълы толтурадыла.

Аскер къаугъагъа къошулгъан ётгюр джердешлерибизге, айхай да, адамланы ташыгъан «Газель» машина бек керекди. Аны бла джаралыланы ташыргъа боллукъду. Андан сора да дизель генераторла, радиостанцияла, бензопилала, къурулуш инвентарь бла материалла, ашарыкъ-азыкъ, кёгет ашыргъандыла.
КъЧР-ни Парламентини спикери Александр Иванов айтхандан, депутатла Къарачай-Черкесиядан баргъан аскерчилеге таймаздан болушлукъ этгенлей турадыла. КъЧР-ни Башчысы Темрезланы Рашидни башламчылыгъы бла къуралгъан аскер къаугъагъа къошулгъанлагъа эмда аланы юйдегилерине къайгъырыргъа джораланнган штабны юсю бла уллу иш этилгенин да чертгенди спикер. 34-чю мотоатыучу бригаданы абычары депутатлагъа разылыгъын билдириб сёлешгенди.
– Аскерчи джашлагъа керекли затланы джыйышдыргъанбыз. Джиберген затларыгъыз барысы да анда бек джарарыкъдыла. Бютюн да уллу разылыгъымы Мутчаланы Дахирге билдирирге излейме. Ол бизни бригаданы къурамында уруш этгенди. Ётгюр эмда ашхы адамды. Бюгюнлюкде ол Парламентни депутатыды. Бизни юсюбюзден сагъыш этгенлей, бизге джараргъа излегенлей турады. Не джаны бла да болушлукъ этер ючюн къалмайды, – дегенди ол.
Депутатла да бизни аскерчилерибиз хорлам бла къайтырыкъларына ажымсыз болгъанларын билдиргендиле.