Бу кюнледе Москвада Къарачай-Черкес Республиканы Башчысы Темрезланы Рашид Россияны эл мюлкюню министрини биринчи заместители Хатуов Джамбулат бла тюбешгенди. Ала Къарачай-Черкес Республикада агропромышленность комплексни джылны озгъан заманында этген ишини эсеблерини бу санагъатны юсю бла  джашауда бардырылгъан эмда келир джыл джарашдырыллыкъ инвестицион проектлени хакъындан сёлешгендиле.
«Къарачай-Черкес Республиканы эл мюлкню бирча ёсдюрюб турурча кючю барды. Россияны Эл мюлк министерствосу регионну агропромышленность комплексини, элледе инфраструктураланы ёсюмюне джораланнган башламчылыгъын, учунмакълыгъын джакълайды», - дегенди Хатуов Джамбулат.

Темрезланы Рашид Россия Федерацияны Эл мюлк министерствосуна, регионлагъа болушлукъ табдыргъаны эмда Къарачай-Черкесияда эллени социал ёсюмлерине терен къайгъыргъаны ючюн, разылыгъын билдиргенди.
Тюбешиуню кёзюуюнде бир къауум кесаматха да къол салгъандыла. Ала республикада инвестицион программаланы джашауда бардырыугъа, аланы ичинде «Устойчивое развитие сельских территорий» деген программаны юсю бла бардырыллыкъ ишлеге джораланнгандыла. Аны тышында Темрезланы Рашид бла Хатуов Джамбулат Россия Федерацияны эл мюлк министри Александр Ткачёв Къарачай-Черкесиягъа къачан келлигин да сюзгендиле.