Федерал машина джоллагъа къарагъан «Кавказ» деген управление шофёрлагъа джолда джюрюуню къоркъуусузлугъун тутаргъа кереклисин эсгертеди.

Къач, къыш заманда, джолда джюрюуню къоркъуусузлугъун сакълаб, бек сакъ джюрюрге керекди. Ол заманда джол чарпыула аз боллукъдула. Къоркъуусуз джюрюуню тамалы уа, машинаны хар несин джарашдырыб турууду. Аны чархларыны джай резинин къыш резиннге ауушдурургъа тыйыншлыды, техника болумун игилендирирге, чыракълары заманнга кёре джанарча этерге, джолда барыуну джоругъун бузмазгъа, аллындагъы машина бла арасын белгиленнген мардагъа кёре тутаргъа, айланчлада, башха джерде, ары-бери бурулгъанын билдирирге керекди. Хауа болум тюрлениб, джол иги кёрюнмеген сагъатда эллени, машиналагъа отлукъ къуйгъан станцияланы, джолда болгъан кафелени къатларында, машинала тохтаучу джерледе тохтаб, болум игиленнгинчи сакъларгъа болады.
Къоркъуусузлукъну джоллада джаяу джюрюген адамла да сакъларгъа борчлудула. Къачда кюн къысхагъа айланыб, дженгил къарангы болуб къалады. Адамланы юслеринде кенгден джылтыраб кёрюннген затлары болургъа тыйыншлыды. Адам машина джолгъа джетген сагъатда, наушниклерин къулагъындан алыб, телефон бла сёлешгенин къоюб, эсин джолгъа толу иерге керекди. Машина джолну ётген сагъатда, белгиленнген джерде болса да, эки джанына къараб, машиналаны тохтагъанларын кёрюб барса игиди.
Федерал машина джоллагъа къарагъан «Кавказ» управление, 2024-чю – 2025-чи джыллада, къыш заманда, машинала тохтаусуз джюрюб турурча эте, кюндюз, кече да кёб тюрлю иш бардырады. Сёз ючюн, Ставрополну, Къабарты-Малкъарны, Къарачай-Черкесияны, Ингушну, Чеченни, Дагъыстанны федерал машина джолларында 525 джол техниканы ишлетеди. Тузу болгъан 200 тонна къум хазыр этгенди.

(Бизни корр.).